Да ліку раней звольненых зорак калектыву Максіма Брагінца, Зміцера Давідовіча, Арцёма Курэня і Ганны Семяняка далучыўся Дзяніс Аўхарэнка: 14 лістапада ён адыграў свой апошні спектакль у РТБД.
Дзяніс нарадзіўся ў 1988 годзе ў Віцебску. Як і частка раней звольненых калег, скончыў Беларускую дзяржаўную акадэмію мастацтваў па спецыяльнасці «акцёр тэатра і кіно» на курсе ў Мікалая Кірычэнкі. Праўда, у РТБД Дзяніс прыйшоў толькі ў 2022 годзе. Да гэтага ён працаваў у Нацыянальным акадэмічным драматычным тэатры імя Якуба Коласа (Віцебск), у Беларускім дзяржаўным моладзевым тэатры (Мінск) і ў Камерным драматычным тэатры «Левендаль» (Санкт-Пецярбург).
Па нашай інфармацыі, у РТБД Дзяніс прыйшоў па запрашэнні сяброў, і цяпер, калі іх звольнілі, вырашыў сысці з тэатра.
Дзяніс таксама быў часткай самых касавых спектакляў — «Шлюб з ветрам», «Забалоцце», «Пачупкі», а таксама выконваў ролю ў папулярнай пастаноўцы па матывах твораў Уладзіміра Караткевіча «Карней».
Як нам паведаміла блізкая да сітуацыі крыніца, усе гэтыя спектаклі аднаўляць не плануюць.
Пры тым што папулярнасць тых жа «Пачупак» і «Шлюбу з ветрам» была каласальная: ахвотныя пабачыць іх не ўлазілі ў сцены РТБД, таму гэтыя спектаклі часам паказвалі ў прасторнейшым Доме афіцэраў.
Вядома, што ў тэатры праводзіў размовы замацаваны за ім ідэолаг. З большай часткай акцёраў яшчэ раней «у мэтах выхавання» былі запісаныя прымусовыя відэа.
«Абстаноўка ў тэатры напружаная, многія баяцца нават паміж сабой стэлефаноўвацца. Тым больш мелі месца даносы. А калі акцёраў затрымалі, увогуле была такая атмасфера, нібыта нехта памёр», — расказала нам абазнаная крыніца. Многія лічаць, што ўсё гэта — дадатковыя запужванні напярэдадні прэзідэнцкіх выбараў.
Рэпрэсіі закранулі тэатр яшчэ ў красавіку 2024 года: тады акцёра Уладзіслава Ноздрына разам з жонкай, таксама актрысай тэатра, асудзілі да 2 гадоў і 6 месяцаў хатняй хіміі за «ўдзел у дзеяннях, якія груба парушаюць грамадскі парадак» (ч. 1 арт. 342 КК). У выніку партфоліа Уладзіслава прыбралі з сайта тэатра.
Але шэрагі тэатра пачалі радзець яшчэ раней — адразу пасля выбараў 2020 года ў знак пратэсту з РТБД звольніліся Андрэй Новік і Мікалай Стонька. Ілля Ясінскі быў вымушаны з'ехаць з краіны пасля таго, як яго затрымалі на адным з маршаў і зламалі пазванкі. У канцы 2021 года з тэатра быў звольнены мастацкі кіраўнік Аляксандр Гарцуеў, які ўзначальваў РТБД з 2012 года. Акрамя таго, РТБД пакінулі Алена Баярова, Марыя Пятровіч, Марына Здаранкова і Максім Шышко.
Пры гэтым новая дырэктарка Святлана Навуменка (яна прыйшла на змену Святлане Карукінай летам 2024 года) падрыхтавала ўласную прэм'еру — у снежні ў тэатры прэзентуюць пастаўленыя ёй «Заручыны» — вечар камедый паводле п’ес «Як яны жаніліся» Аляксандра Валодзьскага і «Пярэстая красуля» Аляксандра Чужыніна.
Галоўныя ролі ў спектаклі дасталіся праверанаму часам складу (напрыклад, заслужанаму артысту Валянціну Салаўёву, які працуе ў тэатры з 2013 года, ці Максіму Паніматчанку, які грае там з 2001-га) і маладняку — тым, хто прыйшоў ужо ў 2022-2023 гадах.
«Адхіленні ад дзяржаўнай палітыкі». Як у Беларусі скарачаецца колькасць выдадзеных па-беларуску кніг
«Гумару я не губляю. Гэта магчымасць рабіць лепшымі дні або хвіліны для кагосьці». Гутарка з Аленай Зуй-Вайцяхоўскай
Пабывалі на прэм'еры спектакля «Ордэн белай мышы», дзе антыўтопія Арлова пераплялася з рэальнасцю
Цяпер чытаюць
На абедзе Лукашэнкі і Сі Цзіньпіна прысутнічала і адзіная дачка кітайскага лідара11
Каментары