«Ён атрымаў польскае грамадзянства за 9 месяцаў»: Ціманоўская ў шоку ад таго, што яе былы муж вярнуўся ў Мінск

Нагадаем: Крысціна Ціманоўская і Арсеній Зданевіч былі разам дзевяць гадоў, з іх шэсць у афіцыйным шлюбе. У хуткім часе пасля грандыёзнага скандалу з удзелам Крысціны на Алімпіядзе ў Токіа Арсеній з’ехаў з Беларусі, палічыўшы, што яму небяспечна там заставацца.

Пазней бягуха распавядала, што за два гады вымушанага пераезду ў Польшчу яны некалькі разоў разыходзіліся. У інтэрв'ю «Нашай Ніве» Крысціна казала, што эміграцыя стала для іх адносін складаным выпрабаваннем: «Магчыма, праблемы былі праз наш раптоўны пераезд, праз тое, што мы абое страцілі ўсё, што ў нас было. Нейкі час я была ў дэпрэсіі, і гэта не вельмі добра адбівалася на нашых адносінах».

Павялічыць

У выніку пара ўсё ж развялася ў 2023 годзе. А Крысціна абвінавачвала былога мужа не толькі ў здрадах, але і ў фінансавых махінацыях.

У непрыгожай гісторыі спрабавала разабрацца «Трыбуна». Выданне пісала, што Арсеній Зданевіч разам з беларускім плыўцом Яўгенам Цуркіным (былым мужам Аляксандры Герасімені) пачаў займацца бізнэсам — купляй і дастаўкай аўтамабіляў з ЗША.

Прадпрыемства працавала так: машыны куплялі на аўкцыёне, рамантавалі і дастаўлялі кліентам у Польшчу.

Аднак урэшце супрацоўніцтва з Цуркіным не атрымала развіцця і наогул згарнулася. Яшчэ вясной мінулага года «Трыбуне» стала вядома пра выхад Цуркіна з аўтамабільнага праекта. Былы муж Ціманоўскай працягнуў ганяць машыны ўжо ў адзіночку. Аднак вельмі падобна, што ў бізнэсе ў Зданевіча паўсталі праблемы.

У матэрыяле «Трыбуны» згадваецца, што Зданевіч зарэгістраваў у Польшчы кампанію USA CAR EXPRESS, якая займалася дастаўкай аўтамабіляў з ЗША. Аднак з восені 2023 года кліенты не атрымлівалі абяцаныя машыны і не маглі звязацца з Зданевічам.

Паведамлялася, што сам Арсеній паехаў у Грузію, дзе працягваў весці раскошны лад жыцця, купляў дарагія рэчы, але не выконваў абавязацельствы перад кліентамі.

Ціманоўская расказала, што Зданевіч нібыта прысабечыў дзве машыны, якія былі купленыя за яе $30 тысяч, а таксама не вярнуў ёй $3 тысячы доўгу.

Крысціна нават заяўляла, што «калі раптам нейкі добры адвакат гатовы ўзяцца за гэтую справу з машынамі, каб дапамагчы і мне, і іншым, то я з задавальненнем буду супрацоўнічаць і нават гатовая паспрыяць у пазбаўленні [Арсенія Зданевіча] польскага грамадзянства, таму што ён гэта грамадзянства атрымаў дзякуючы мне».

І вось цяпер бягуха заўважыла, што былы каханы спакойна танчыць у рылсе мінскай «Мегамыйні» на вуліцы Караля. У подпісу да жартлівага відэа пытаюцца: «Каму даць прэмію?». Дарэчы, апублікаваны ён 21 студзеня.

Павялічыць

Крысціна ў шоку ад таго, што былы муж у прынцыпе адважыўся перасекчы мяжу радзімы (хаця ўдакладняе, што, згодна з яе інфармацыяй, Арсеній спачатку паехаў у Расію, а потым у Беларусь):

«Па-першае, ён атрымаў у Польшчы польскае грамадзянства праз подпіс прэзідэнта за 9 месяцаў, таму што з'яўляецца палітычным уцекачом і пры падачы на ​​грамадзянства пазначыў у анкеце, што яму небяспечна вяртацца ў Беларусь. Па-другое, ён даваў шмат інтэрв'ю супраць улады, а таксама ў яго было шмат сторыс пра 2020, выбары, мітынгі і вайну ва Украіне. Па-трэцяе, разам са мной ён хадзіў на мітынгі ў Польшчы і насіў БЧБ-сцяг».

Таксама яна сцвярджае, што Арсенія шукае паліцыя ў дзвюх краінах.

Крысціна тэгнула ў сваіх сторыс акаўнты МУС Беларусі, а таксама памежнай службы.

• 6
• 3
• 30
• 102
• 3
• 1
• 5
• 0