Расійскі тыктокер Азамат Айталіеў прыехаў у Гомель, каб здзекавацца з бяздомнай жанчыны

Падчас свайго чарговага візіту ў Беларусь Азамат Айталіеў, які любіць хадзіць па дарагіх рэстаранах і правяраць там нервовую сістэму адміністратараў, наведаў Гомель.

Раней блогер ужо казаў, што шукае каханне. Патрабаванняў было не вельмі шмат: ён шукаў прыгожую, здаровую жанчыну, якая б падзяляла любоў Азамата да вандровак і ўсюды суправаджала яго.

Цяпер ён распавёў, быццам знайшоў прыдатную кандыдатуру. У гомельскім рэстаране «Сябры» Айталіеў сустрэўся з іншым вядомым тыктокерам — Анатолем Rubakha Go, які прывёў з сабой бяздомную жанчыну Вікторыю.

Нагадаем: летась Анатоль, дзякуючы ўдзелу ў яго здымках Вікторыі, выйграў у конкурсе расійскага блогера аўтамабіль BMW M4. Хлопец абяцаў, што прадасць прыз і набудзе кватэру бяздомнай жанчыне. Але пакуль тое абяцанне Анатоль не выканаў.

Нядаўна, каб перамагчы ў тыкток-батле, блогер паабяцаў пагаліць Вікторыю нагала. Падарункі адразу пасыпаліся, і Анатоль перамог. А пасля адвёў Вікторыю ў цырульню, дзе жанчыне састрыглі валасы пад нуль. На відэа было бачна, наколькі ёй непрыемна ва ўсім гэтым удзельнічаць, але нікога гэта не спыніла.

Цяпер жа хайпаваць на бяздомнай пачаў і Азамат Айталіеў, які ставіўся да Вікторыі зняважліва-іранічна. Блогер нясмешна жартаваў, што дорыць ёй гаршчок, у які ў дзяцінстве «нешта рабіў».

— Бачыце, якая ў мяне прыгажуня, — рагатаў расіянін. — Блатная такая.

А дзень таму Айталіеў выклад відэа, як быццам бы ажаніўся з Вікторыяй. На жанчыну надзелі белую сукенку і пінжак, не забыліся і пра фату. Запісалі ролік побач з вялікім чырвоным сэрцам.

Цырымонію праводзіў той самы тыктокер Анатоль.

— Каханне маё! — хіхікаў Азамат, неакуратна надзяваючы жанчыне пярсцёнак на палец. Прыкрываючыся фатой, ён зрабіў выгляд, быццам цалуе нявесту. — Мы будзем жыць доўга!

Ролік набраў 650 тысяч праглядаў і 29 тысяч лайкаў.

Каментарый, які набраў каля 8 тысяч лайкаў, гучыць так: «На жаль, Вікторыю выкарыстоўваюць. Шкада жанчыну».

Падобнае відэа ў акаўнце Rubakha Go набрала за дзень 7 мільёнаў праглядаў і 755 тысяч лайкаў. Там шмат каментарыяў прысвечаны таму, што Вікторыю шкада і такіх здзекаў яна не заслугоўвае.

Іншыя блогеры ўжо пачалі запісваць ролікі ў падтрымку Вікторыі. Напрыклад, тыктокерка пад нікам Red Women крытыкуе тое, якім чынам вырашылі раскруціць трэцюю старонку Азамата ў тыктоку.

— Відэа выглядае агідна. І не толькі таму, што Вікторыя — жанчына, з якой проста здзекуюцца. Але і таму, што кучаравы хлопец падае прыклад падрастаючаму пакаленню. Ён літаральна кажа: «Хлопцы, вы можаце знайсці на вуліцы бамжа і рабіць з ім кантэнт, зарабляючы тым самым грошы».

• 1
• 7
• 3
• 17
• 2
• 4
• 43
• 0