Як жыве бяздомная жанчына з Гомеля, якой блогер абяцаў купіць кватэру
«Маё жыццё змянілася ў вельмі добры бок, і я вельмі задаволеная».
У лістападзе мінулага года папулярны беларускі блогер з Гомеля Анатоль Rubakha Go расказаў пра свой намер купіць кватэру гераіні свайго блога Вікторыі. Цяпер яна расказала пра сваё жыццё.
Анатоль зняў новае відэа, у якім разам з Вікторыяй адказаў на пытанні гледачоў. Па словах блогера, ён пазнаёміўся з жанчынай у 2017 ці 2018 годзе.
«Тады ў нас быў другі праект. Там трохі здымаліся Вікторыя і яе знаёмы. У мінулым годзе пачалі здымаць канал у тыкток. Прапанаваў Вікторыі здымацца. Яна пагадзілася», — расказвае Анатоль і падкрэслівае, што яны не з'яўляюцца сваякамі.
Па словах Вікторыі, яны з Анатолем добрыя знаёмыя. Жанчына прызнаецца, што ёй цікава як здымацца ў відэа, так і весці прамыя трансляцыі.
Вікторыя расказала, што ёй 55 гадоў. Скончыла 8 класаў, пайшла вучыцца ў ПТВ на аператара станкоў з лічбавым праграмным кіраваннем. Затым працавала памочніцай выхавацеля ў дзіцячым садку, ліфцёрам у бальніцы.
«Я была замужам. Цяпер разведзеная. Дзеці ёсць. Двое. Дзяўчынка і хлопчык», — коратка паведаміла жанчына і прызналася, што з дзецьмі не мае стасункаў з 2007 года.
Відэа з Вікторыяй Анатоль здымае ўжо больш за год. За гэты час, па словах жанчыны, яе жыццё «змянілася ў добры бок» і яна «вельмі задаволеная». Яе часта пазнаюць на вуліцах горада, у крамах. Як дарослыя, так і дзеці просяць сфатаграфавацца разам.
«Падышлі два хлопчыкі-школьнікі. Клас, можа, трэці— чацвёрты. Адзін пасаромеўся фатаграфавацца. А другі кажа: «Можна з вамі сфатаграфавацца?» Я кажу: «Можна». Пазнаюць многа і часта», — прызнаецца жанчына.
Цяпер Вікторыя жыве ў сваёй знаёмай. Па словах Анатоля, яго абяцанне набыць кватэру застаецца ў сіле. Грошы на яе блогер разлічвае атрымаць ад продажу машыны, якую ён выйграў у конкурсе, што праводзіў расійскі блогер. Цяпер машына прадаецца.
«У гэты момант шукаем пакупніка. [Далей] набываем кватэру для Вікторыі. Афармляем яе на Вікторыю. Яна там будзе жыць. Што яна з ёй зробіць? Яна можа яе прадаць, усё, што захоча. Але я, зразумела, гэтага не хачу. Хачу, каб яна ўсё сваё жыццё пражыла ў гэтай кватэры, каб у яе быў свой куток, куды яна можа прыйсці ў любы момант. Таму я буду рабіць усё, каб захаваць гэтую кватэру Вікторыі», — гаворыць Анатоль.
Цяпер чытаюць
Беларусы ў сацсетках абураюцца, што дэкрэтніцам нібыта плацяць больш, чым тым, хто ходзіць на працу4
Каментары
Далей будзе прапанова кінуць трохі грошай. Бо з БМВ не хапіла.