Прэзідэнт ЗША Дональд Трамп у панядзелак правядзе сустрэчу з вышэйшымі чыноўнікамі сваёй адміністрацыі, адказнымі за абарону і бяспеку, каб абмеркаваць палітыку ў дачыненні да Украіны. Пра гэта паведамляе The New York Times са спасылкай на неназванага прадстаўніка адміністрацыі.
Паводле яго слоў, у нарадзе возьмуць удзел, у тым ліку дзяржсакратар Марка Рубіа і міністр абароны Піт Хегсет. Як паведамляецца, будуць разглядацца розныя варыянты дзеянняў, у тым ліку прыпыненне або поўная адмена ваеннай дапамогі Украіне, уключаючы ўжо ўзгодненыя пры адміністрацыі Байдэна пастаўкі боепрыпасаў і абсталявання.
Афіцыйна Белы дом пра гэтую сустрэчу не паведамляў.
28 лютага перамовы Трампа і прэзідэнта Украіны Уладзіміра Зяленскага ў Белым доме завяршыліся публічнай перапалкай, пасля чаго ўкраінская дэлегацыя датэрмінова пакінула Белы дом. Падрыхтаванае пагадненне аб супрацоўніцтве ў сферы здабычы карысных выкапняў і стварэнні інвестыцыйнага фонду так і не было падпісана.
Пасля гэтага як сам прэзідэнт ЗША, так і высокапастаўленыя прадстаўнікі адміністрацыі заявілі, што сумняюцца ў імкненні ўкраінскага лідара да міру з Расіяй. Акрамя таго, яны адзначылі, што Зяленскі праявіў непавагу да Трампа, уступіўшы з ім у палеміку.
У панядзелак Трамп у сацыяльнай сетцы Truth напісаў, што лічыць, што ЗША варта менш турбавацца пра дзеянні расійскага прэзідэнта Уладзіміра Пуціна і больш — пра ўнутраныя праблемы.
«Мы павінны менш турбавацца пра Пуціна, а больш — пра банды мігрантаў-гвалтаўнікоў, наркабаронаў, забойцаў і людзей з псіхіятрычных клінік, якія ўязджаюць у нашу краіну — каб мы не сталі падобнымі да Еўропы!» — напісаў Трамп.
Заява Трампа зроблена на фоне актывізацыі кантактаў паміж Вашынгтонам і Масквой.
Цяпер чытаюць
Хто тая беларуска, якую экстрадавалі ў ЗША для суда за кантрабанду дэталяў для самалётаў6
Каментары