Міліцыя паведаміла пра затрыманне 30-гадовага мінчука, які займаўся незаконнымі раскопкамі на тэрыторыях баявых дзеянняў часоў Другой сусветнай дзеля пошуку зброі, боепрыпасаў, выбуховых прылад.
Разбор небяспечных знаходак ён рабіў дома. Мужчына стварыў тэматычны канал на YouTube, піша МУС.
Таксама паведамляецца, што ў выніку агляду кватэры ў яго нібыта былі выяўленыя і канфіскаваныя боепрыпасы.
«Прызначаная балістычная экспертыза, вырашаецца пытанне аб завядзенні крымінальнай справы за незаконныя дзеянні ў дачыненні да агнястрэльнай зброі, боепрыпасаў і выбуховых рэчываў», — паведамляе МУС, зазначаючы, што затрыманаму блогеру пагражае да 7 гадоў пазбаўлення волі.
Блогер, пра якога размова, — Валянцін Бойка. Ён вядзе ютуб-канал «Каля металу», дзе 870 падпісчыкаў.
Каментары