Кітаянка зрабіла больш за 100 пластычных аперацый і цяпер выглядае так

Як піша ВВС, Абі Ву (Abby Wu) было ўсяго 14 гадоў, калі яна ўпершыню зрабіла касметычную аперацыю. Пасля гарманальнай тэрапіі, звязанай з хваробай, яе вага за два месяцы павялічылася з 42 да 62 кілаграмаў. Гэта не засталося незаўважаным для яе педагога па акцёрскім майстэрстве, які паставіў умову: каб працягваць навучанне, яна павінна хутка пахудзець.

Маці павяла дачку на ліпасакцыю — выдаліць тлушч з жывата і ног. Аперацыя аказалася траўматычнай. Абі зрабілі толькі частковую анестэзію, і яна заставалася ў прытомнасці.

«Я бачыла, колькі тлушчу з мяне выдалілі і колькі крыві страціла», — згадвае жанчына.

Павялічыць

Сёння Абі 35 гадоў, і яна ўжо перанесла больш за 100 касметычных працэдур, выдаткаваўшы каля 500 тысяч даляраў.

Яна стала саўладальніцай клінікі прыгажосці ў цэнтры Пекіна і — адным з самых пазнавальных твараў кітайскага буму пластычнай хірургіі.

Але гэты шлях пакінуў фізічныя наступствы. У сваёй раскошнай двухузроўневай кватэры ў Пекіне Абі сядзіць перад люстэркам і акуратна маскіруе сінякі пасля чарговай ін’екцыі для змяншэння аб’ёму твару. Такую працэдуру яна праходзіць штомесяц пасля трох аперацый па рэдукцыі ніжняй сківіцы, калі было выдалена занадта шмат косткі.

Аднак яна настойвае: ні пра што не шкадуе і лічыць, што яе маці тады зрабіла правільны выбар:

«Аперацыя спрацавала. Я стала больш упэўненай, больш шчаслівай з кожным днём. Думаю, мама прыняла правільнае рашэнне».

Бум касметычнай медыцыны

Штогод у Кітаі каля 20 мільёнаў чалавек робяць касметычныя працэдуры. 80% з іх — жанчыны, сярэдні ўзрост — 25 гадоў. Раней ідэалам лічыліся рысы з элементамі заходняй, карэйскай і анімэ-эстэтыкі: двайное павека, вузкі твар, выступаючы нос.

Сёння ўсё часцей праводзяцца незвычайныя і нават дзіўныя працэдуры, каб адпавядаць новым стандартам «экраннай прыгажосці»:

• Ботакс колюць за вушы, каб нахіліць іх наперад — гэта візуальна звужае твар.
• Аперацыі на ніжніх веках надаюць вачам наіўны, дзіцячы выгляд, як у гераінь анімэ.
• Скарачаюць верхнюю губу, каб зменшыць адлегласць да носа — лічыцца, што гэта «амалоджвае».

Але галоўнае — усё гэта разлічана на тое, як твар выглядае на экране, а не ў рэальным жыцці. 

Алгарытмы прыгажосці

У Кітаі хутка набіраюць папулярнасць дадаткі для пластычнай хірургіі, такія як SoYoung і GengMei. Яны прапануюць алгарытмічны аналіз «недахопаў твару»: карыстальнік загружае фота, а праграма скануе яго і выдае спіс рэкамендаваных аперацый, а таксама бліжэйшыя клінікі. За кожную праведзеную працэдуру сэрвіс атрымлівае камісію.

Павялічыць

Гэтыя платформы таксама працуюць як сацыяльныя сеткі: карыстальнікі выкладваюць фота «да і пасля», вядуць дзённікі аперацый, раяцца з «суперкарыстальнікамі».

Абі Ву, якая зрабіла больш за сотню аперацый, дакументавала кожны крок у сацсетках і далучылася да SoYoung адразу пасля яго запуску.

І нават пасля ўсіх гэтых змен калі Абі скануе твар праз функцыю «чароўнае люстэрка», дадатак працягвае знаходзіць «заганы» і прапаноўваць новыя працэдуры: «Мяшкі пад вачыма… павялічыць падбародак… звузіць нос…»

Абі толькі ўсміхаецца: «Нос? Я ж ужо яго рабіла».

Сістэма не пакідае месца для пачуцця завершанасці: нават тыя, хто нібыта дасягнуў ідэалу, зноў і зноў атрымліваюць прапановы таго, што «трэба паправіць».

Цана прыгажосці

Рэзкі рост індустрыі прывёў да з’яўлення дзясяткаў тысяч нелегальных клінік і спецыялістаў без ліцэнзіі. Паводле звестак iResearch, на 2019 год у Кітаі дзейнічала каля 80 000 нелегальных медустаноў, а 100 000 чалавек працавалі без адпаведнай кваліфікацыі. У выніку — сотні няўдалых аперацый з ускладненнямі штодня.

Адна з пацярпелых — 28-гадовая Юэ Юэ (Yue Yue), якая ў 2020 годзе зрабіла ін’екцыі калагену ў клініцы знаёмай, якая не мела ліцэнзіі. Філеры зацвярдзелі, і, паводле яе слоў, «скура адчувалася, быццам пад ёй бетон».

Спробы выправіць сітуацыю ў іншых клініках толькі пагоршылі стан: адна пашкодзіла яе ўласныя тканкі, другая пакінула шнары. Зараз яна праходзіць лячэнне ў ліцэнзаванага хірурга і перанесла ўжо тры аднаўленчыя аперацыі, але частка пашкоджанняў незваротная.

Павялічыць

Некаторыя легальныя клінікі таксама парушаюць правілы. У 2020 годзе актрыса Гао Лю (Gao Liu) пацярпела падчас няўдалай аперацыі ў клініцы She's Times: кончык яе носа пачарнеў і адмёр. Пасля скандалу клініку закрылі, доктара адхілілі ад практыкі на паўгода. Але перад гэтым па тым самым адрасе была зарэгістраваная новая клініка.

Пластычная хірургія ў Кітаі — больш не проста медыцынская паслуга. Яна стала часткай эканомікі, культуры і алгарытмаў. Твар — больш не адлюстраванне асобы, а праект, які бясконца дапрацоўваецца, рэдагуецца і прадаецца.

• 2
• 0
• 2
• 26
• 6
• 0
• 0
• 0