Kitajanka zrabiła bolš za 100 płastyčnych apieracyj i ciapier vyhladaje tak

Jak piša VVS, Abi Vu (Abby Wu) było ŭsiaho 14 hadoŭ, kali jana ŭpieršyniu zrabiła kaśmietyčnuju apieracyju. Paśla harmanalnaj terapii, źviazanaj z chvarobaj, jaje vaha za dva miesiacy pavialičyłasia z 42 da 62 kiłahramaŭ. Heta nie zastałosia niezaŭvažanym dla jaje piedahoha pa akciorskim majsterstvie, jaki pastaviŭ umovu: kab praciahvać navučańnie, jana pavinna chutka pachudzieć.

Maci paviała dačku na lipasakcyju — vydalić tłušč z žyvata i noh. Apieracyja akazałasia traŭmatyčnaj. Abi zrabili tolki častkovuju aniesteziju, i jana zastavałasia pry śviadomaści.

«Ja bačyła, kolki tłušču ź mianie vydalili i kolki kryvi straciła», — zhadvaje žančyna.

Pavialičyć

Siońnia Abi 35 hadoŭ, i jana ŭžo pieraniesła bolš za 100 kaśmietyčnych pracedur, vydatkavaŭšy kala 500 tysiač dalaraŭ.

Jana stała saŭładalnicaj kliniki pryhažości ŭ centry Piekina i — adnym z samych paznavalnych tvaraŭ kitajskaha bumu płastyčnaj chirurhii.

Ale hety šlach pakinuŭ fizičnyja nastupstvy. U svajoj raskošnaj dvuchuzroŭnievaj kvatery ŭ Piekinie Abi siadzić pierad lusterkam i akuratna maskiruje siniaki paśla čarhovaj injekcyi dla źmianšeńnia abjomu tvaru. Takuju praceduru jana prachodzić štomiesiac paśla troch apieracyj pa redukcyi nižniaj skivicy, kali było vydalena zanadta šmat kostki.

Adnak jana nastojvaje: ni pra što nie škaduje i ličyć, što jaje maci tady zrabiła pravilny vybar:

«Apieracyja spracavała. Ja stała bolš upeŭnienaj, bolš ščaślivaj z kožnym dniom. Dumaju, mama pryniała pravilnaje rašeńnie».

Bum kaśmietyčnaj miedycyny

Štohod u Kitai kala 20 miljonaŭ čałaviek robiać kaśmietyčnyja pracedury. 80% ź ich — žančyny, siaredni ŭzrost — 25 hadoŭ. Raniej ideałam ličylisia rysy z elemientami zachodniaj, karejskaj i anime-estetyki: dvajnoje pavieka, vuzki tvar, vystupajučy nos.

Siońnia ŭsio čaściej pravodziacca niezvyčajnyja i navat dziŭnyja pracedury, kab adpaviadać novym standartam «ekrannaj pryhažości»:

• Botaks koluć za vušy, kab nachilić ich napierad — heta vizualna zvužaje tvar.
• Apieracyi na nižnich viekach nadajuć vačam naiŭny, dziciačy vyhlad, jak u hieraiń anime.
• Skaračajuć vierchniuju hubu, kab źmienšyć adlehłaść da nosa — ličycca, što heta «amałodžvaje».

Ale hałoŭnaje — usio heta raźličana na toje, jak tvar vyhladaje na ekranie, a nie ŭ realnym žyćci. 

Ałharytmy pryhažości

U Kitai chutka nabirajuć papularnaść dadatki dla płastyčnaj chirurhii, takija jak SoYoung i GengMei. Jany prapanujuć ałharytmičny analiz «niedachopaŭ tvaru»: karystalnik zahružaje fota, a prahrama skanuje jaho i vydaje śpis rekamiendavanych apieracyj, a taksama bližejšyja kliniki. Za kožnuju praviedzienuju praceduru servis atrymlivaje kamisiju.

Pavialičyć

Hetyja płatformy taksama pracujuć jak sacyjalnyja sietki: karystalniki vykładvajuć fota «da i paśla», viaduć dziońniki apieracyj, rajacca z «supierkarystalnikami».

Abi Vu, jakaja zrabiła bolš za sotniu apieracyj, dakumientavała kožny krok u sacsietkach i dałučyłasia da SoYoung adrazu paśla jaho zapusku.

I navat paśla ŭsich hetych źmien kali Abi skanuje tvar praz funkcyju «čaroŭnaje lusterka», dadatak praciahvaje znachodzić «zahany» i prapanoŭvać novyja pracedury: «Miaški pad vačyma… pavialičyć padbarodak… zvuzić nos…»

Abi tolki ŭśmichajecca: «Nos? Ja ž užo jaho rabiła».

Sistema nie pakidaje miesca dla pačućcia zavieršanaści: navat tyja, chto nibyta dasiahnuŭ ideału, znoŭ i znoŭ atrymlivajuć prapanovy taho, što «treba papravić».

Cana pryhažości

Rezki rost industryi pryvioŭ da źjaŭleńnia dziasiatkaŭ tysiač nielehalnych klinik i śpiecyjalistaŭ bieź licenzii. Pavodle źviestak iResearch, na 2019 hod u Kitai dziejničała kala 80 000 nielehalnych miedustanoŭ, a 100 000 čałaviek pracavali biez adpaviednaj kvalifikacyi. U vyniku — sotni niaŭdałych apieracyj z uskładnieńniami štodnia.

Adna z paciarpiełych — 28-hadovaja Jue Jue (Yue Yue), jakaja ŭ 2020 hodzie zrabiła injekcyi kałahienu ŭ klinicy znajomaj, jakaja nie mieła licenzii. Filery zaćviardzieli, i, pavodle jaje słoŭ, «skura adčuvałasia, byccam pad joj bieton».

Sproby vypravić situacyju ŭ inšych klinikach tolki pahoršyli stan: adna paškodziła jaje ŭłasnyja tkanki, druhaja pakinuła šnary. Zaraz jana prachodzić lačeńnie ŭ licenzavanaha chirurha i pieraniesła ŭžo try adnaŭlenčyja apieracyi, ale častka paškodžańniaŭ niezvarotnaja.

Pavialičyć

Niekatoryja lehalnyja kliniki taksama parušajuć praviły. U 2020 hodzie aktrysa Hao Lu (Gao Liu) paciarpieła padčas niaŭdałaj apieracyi ŭ klinicy She's Times: končyk jaje nosa pačarnieŭ i admior. Paśla skandału kliniku zakryli, doktara adchilili ad praktyki na paŭhoda. Ale pierad hetym pa tym samym adrasie była zarehistravanaja novaja klinika.

Płastyčnaja chirurhija ŭ Kitai — bolš nie prosta miedycynskaja pasłuha. Jana stała častkaj ekanomiki, kultury i ałharytmaŭ. Tvar — bolš nie adlustravańnie asoby, a prajekt, jaki biaskonca dapracoŭvajecca, redahujecca i pradajecca.

• 2
• 0
• 2
• 12
• 3
• 0
• 0
• 0