Індыя заявіла, што нанесла ўдары па Пакістане і раёнах Кашміра, якія кантралююцца пакістанскімі ўладамі.
Гэта адбылося праз два тыдні пасля таго, як Дэлі абвінаваціў Ісламабад у падтрымцы баевікоў, адказных за напад на турыстаў у частцы Кашміра, якую кантралюе Індыя. Тады загінулі 26 чалавек. Улады Пакістана абвінавачанні адхілілі, піша Бі-бі-сі.
«Узброеныя сілы Індыі пачалі аперацыю «Сіндура», нанёсшы ўдары па тэрарыстычнай інфраструктуры ў Пакістане і акупаваных Пакістанам Джаму і Кашміры, адкуль планаваліся і каардынаваліся тэрарыстычныя атакі супраць Індыі», — гаворыцца ў заяве.
Індыйскія ўлады сцвярджаюць, што ракетныя ўдары былі нанесены па дзевяці аб’ектах, звязаных з баевікамі, аднак пакістанскія ўлады гэта абвяргаюць.
«Нашы дзеянні былі мэтанакіраванымі, ўзважанымі і не эскалацыйнымі па сваёй сутнасці. Ніводны ваенны аб’ект Пакістана не быў атакаваны. Індыя праявіла значную стрыманасць у выбары мэт і метадаў іх паражэння», — заявіла Індыя.
Пакістанская армія заявіла, што ўдары прыйшліся па раёнах з мірным насельніцтвам, а не па тэрарыстах. Паводле яе дадзеных, індыйскія самалёты запускалі ракеты са сваёй паветранай прасторы.
Прэс-служба Пакістана сцвярджае, што ў выніку індыйскіх удараў загінулі восем чалавек, 35 атрымалі раненні, двое лічацца зніклымі без вестак. Раней прэс-сакратар арміі Пакістана Ахмед Шарыф сказаў Бі-бі-сі, што сярод загінулых — двое дзяцей.
Адзін з удараў, паводле Шарыфа, прыйшоўся па мячэці. Прэм’ер-міністр Пакістана Міян Мухамад Шахбаз Шарыф выступіў з заявай, у якой паабяцаў адказаць Індыі.
«Падступны вораг нанёс подлы ўдар па пяці аб’ектах у Пакістане. Пакістан мае поўнае права даць адпаведны адказ, і гэты адпаведны адказ ужо даецца», — заявіў прэм’ер-міністр.
Пазней у ноч на сераду прэс-служба пакістанскай арміі ўдакладніла, што Індыя нанесла 24 асобныя ўдары рознымі відамі ўзбраення па шасці месцах.
Прадстаўнік пакістанскіх вайскоўцаў заявіў, што Ісламабад «адкажа ў зручны для сябе час і ў зручным месцы».
«Усе знішчальнікі нашых ВПС падняты ў паветра. Гэта ганебнае і баязлівае нападзенне, якое было здзейснена з паветранай прасторы Індыі», — заявіў ён.
Паводле паведамленняў з індыйскага боку, пакістанская армія адкрыла артылерыйскі агонь на лініі падзелу ў Кашміры.
Пазней у ноч на сераду прэс-аташэ пакістанскай арміі паведаміў, што Пакістан збіў пяць індыйскіх баявых самалётаў, у тым ліку тры французскія знішчальнікі Rafale і два савецка-расійскія самалёты Су-30МКІ і МіГ-29. Пацверджанняў ці абвяржэнняў з індыйскага боку пакуль няма.
Акрамя таго, паводле пакістанскай арміі, яна знішчыла штаб адной з індыйскіх брыгад.
Індыйскія ўлады закрылі ўсе навучальныя ўстановы ў раёнах уздоўж лініі кантролю. Пакістан таксама закрыў школы ў сталіцы, Ісламабадзе (ён знаходзіцца недалёка ад лініі кантролю), і іншых прыгранічных раёнах.
На мяжы дзвюх краін апошнія дні адбываліся перастрэлкі. Выказваліся здагадкі, што Індыя адкажа ваеннымі ўдарамі па Пакістану, як яна гэта рабіла пасля нападаў баевікоў у 2019 і 2016 гадах.
Юрась Зянковіч расказаў пра сваё вызваленне і шлях у ЗША6
Каментары