Indyja zajaviła, što naniesła ŭdary pa Pakistanie i rajonach Kašmira, jakija kantralujucca pakistanskimi ŭładami.
Heta adbyłosia praz dva tydni paśla taho, jak Deli abvinavaciŭ Isłamabad u padtrymcy bajevikoŭ, adkaznych za napad na turystaŭ u častcy Kašmira, jakuju kantraluje Indyja. Tady zahinuli 26 čałaviek. Ułady Pakistana abvinavačańni adchilili, piša Bi-bi-si.
«Uzbrojenyja siły Indyi pačali apieracyju «Sindura», naniosšy ŭdary pa terarystyčnaj infrastruktury ŭ Pakistanie i akupavanych Pakistanam Džamu i Kašmiry, adkul płanavalisia i kaardynavalisia terarystyčnyja ataki suprać Indyi», — havorycca ŭ zajavie.
Indyjskija ŭłady śćviardžajuć, što rakietnyja ŭdary byli naniesieny pa dzieviaci abjektach, źviazanych z bajevikami, adnak pakistanskija ŭłady heta abviarhajuć.
«Našy dziejańni byli metanakiravanymi, ŭzvažanymi i nie eskałacyjnymi pa svajoj sutnaści. Nivodny vajenny abjekt Pakistana nie byŭ atakavany. Indyja prajaviła značnuju strymanaść u vybary met i mietadaŭ ich paražeńnia», — zajaviła Indyja.
Pakistanskaja armija zajaviła, što ŭdary pryjšlisia pa rajonach ź mirnym nasielnictvam, a nie pa terarystach. Pavodle jaje dadzienych, indyjskija samaloty zapuskali rakiety sa svajoj pavietranaj prastory.
Pres-słužba Pakistana śćviardžaje, što ŭ vyniku indyjskich udaraŭ zahinuli vosiem čałaviek, 35 atrymali ranieńni, dvoje ličacca źnikłymi bieź viestak. Raniej pres-sakratar armii Pakistana Achmied Šaryf skazaŭ Bi-bi-si, što siarod zahinułych — dvoje dziaciej.
Adzin z udaraŭ, pavodle Šaryfa, pryjšoŭsia pa miačeci. Premjer-ministr Pakistana Mijan Muchamad Šachbaz Šaryf vystupiŭ z zajavaj, u jakoj paabiacaŭ adkazać Indyi.
«Padstupny vorah nanios podły ŭdar pa piaci abjektach u Pakistanie. Pakistan maje poŭnaje prava dać adpaviedny adkaz, i hety adpaviedny adkaz užo dajecca», — zajaviŭ premjer-ministr.
Paźniej u noč na sieradu pres-słužba pakistanskaj armii ŭdakładniła, što Indyja naniesła 24 asobnyja ŭdary roznymi vidami ŭzbrajeńnia pa šaści miescach.
Pradstaŭnik pakistanskich vajskoŭcaŭ zajaviŭ, što Isłamabad «adkaža ŭ zručny dla siabie čas i ŭ zručnym miescy».
«Usie źniščalniki našych VPS padniaty ŭ pavietra. Heta haniebnaje i bajaźlivaje napadzieńnie, jakoje było ździejśniena z pavietranaj prastory Indyi», — zajaviŭ jon.
Pavodle paviedamleńniaŭ ź indyjskaha boku, pakistanskaja armija adkryła artyleryjski ahoń na linii padziełu ŭ Kašmiry.
Paźniej u noč na sieradu pres-ataše pakistanskaj armii paviedamiŭ, što Pakistan źbiŭ piać indyjskich bajavych samalotaŭ, u tym liku try francuzskija źniščalniki Rafale i dva saviecka-rasijskija samaloty Su-30MKI i MiH-29. Paćvierdžańniaŭ ci abviaržeńniaŭ ź indyjskaha boku pakul niama.
Akramia taho, pavodle pakistanskaj armii, jana źniščyła štab adnoj ź indyjskich bryhad.
Indyjskija ŭłady zakryli ŭsie navučalnyja ŭstanovy ŭ rajonach uzdoŭž linii kantrolu. Pakistan taksama zakryŭ škoły ŭ stalicy, Isłamabadzie (jon znachodzicca niedaloka ad linii kantrolu), i inšych pryhraničnych rajonach.
Na miažy dźviuch krain apošnija dni adbyvalisia pierastrełki. Vykazvalisia zdahadki, što Indyja adkaža vajennymi ŭdarami pa Pakistanu, jak jana heta rabiła paśla napadaŭ bajevikoŭ u 2019 i 2016 hadach.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary