Кансультантка ўпраўлення агульнай сярэдняй адукацыі Галоўнага ўпраўлення агульнай сярэдняй і дашкольнай адукацыі Мінадукацыі Анжэла Кудаярава на прэс-канферэнцыі ў Мінску расказала, калі ў беларускіх школьнікаў з'явіцца магчымасць пераздаць нулявыя вынікі цэнтралізаванага экзамена (ЦЭ), піша «Смартпрэс».
Паводле слоў чыноўніцы, змены ўжо ўнесеныя ў нарматыўна-прававыя акты. Яны набудуць моц з 1 верасня 2025 года.
«Вучняў, якія здалі цэнтралізаваны экзамен на нулявы вынік, будуць дапускаць для праходжання цэнтралізаванага экзамена ў іншыя тэрміны ў жніўні. Дзейнічаць норма будзе ўпершыню толькі на цэнтралізаваным экзамене ў 2026 годзе», — дадала прадстаўніца Мінадукацыі.
Раней магчымасці пераздачы цэнтралізаванага экзамену ў Беларусі не было — тыя, хто праходзіў выпрабаванне на 0 балаў, атрымлівалі даведку аб навучанні, а атэстат ім выдаваўся толькі праз год. Напрыклад, у 2024 годзе такіх выпадкаў было 64.
Акрамя гэтага, Анжэла Кудаярава расказала, калі абітурыентам чакаць вынікі ЦЭ ў 2025 годзе. Паводле яе слоў, гэта павінна адбыцца не пазней за 11 чэрвеня, бо 13 чэрвеня па ўсёй Беларусі пройдуць выпускныя з уручэннем атэстатаў.
Памёр палітвязень Валянцін Штэрмер. «Ледзь хадзіў пасля інсульту — а яго кінулі ў ШІЗА»7
Каментары