Цапкала: Папулярнасць Ціханоўскай — вынік накрутак і маніпуляцый
Дарадца Албанскай інвестыцыйнай карпарацыі Валер Цапкала працягвае сваю зацятую барацьбу са Святланай Ціханоўскай і яе камандай. Палітык перакананы, што існуюць спецыяльныя фермы ботаў, якія падтрымліваюць Ціханоўскую і цкуюць яе крытыкаў — такіх, як сам. «Мы з вамі ведаем, каму гэта ботаферма належыць», — канспіралагічна намякае палітык.
У сваім чарговым стрыме Валерый Цапкала пераконваў слухачоў, што частка беларускай дэмакратычнай эміграцыі нібыта задзейнічае ботаў для штучнага стварэння медыйнай папулярнасці.
Цапкала згадаў, што прыкладна год таму стала вядома пра існаванне ў Тбілісі фабрыкі ботаў, звязанай з Free Russia Foundation і асацыяванай, па яго словах, з фондам Навальнага.
Гэта першая маніпуляцыя ад Цапкалы — няма ніякіх доказаў сувязі фабрыкі ботаў з Фондам барацьбы з карупцыяй Навальнага.
«Гэтыя хлопцы, расійская ботаферма, прызналіся, што на паверх вышэй знаходзілася 50 чалавек — беларуская ботаферма», — працягваў палітык.
Ён прызнаецца, што «метадычак не бачыў», аднак катэгарычна сцвярджае: «мы абсалютна з вамі ведаем, каму гэта ботаферма належыць».
Цапкала расказвае, што яна была створана і фінансавалася за кошт еўрапейскіх і амерыканскіх грантаў, якія прызначаліся для падтрымкі незалежных медыя. Тут ён зноў не прыводзіць ніякіх пацвярджэнняў сваім заявам.
Цапкала сцвярджае, што «цалкам дакладнае было ўказанне гэтым ботам накручваць прагляды Вячоркі, Ціханоўскай і кампаніі» і адначасова «гнабіць, і ўсялякія даваць негатыўныя каментарыі» адносна «іншых людзей», у тым ліку і яго самога, «калі мы вядзём падобнага кшталту стрымы». Усё гэта таксама фантазіі Цапкалы, не падмацаваныя фактамі.
Зрэшты, Цапкала прызнае, што яго развагі не маюць доказаў — але ўпэўнены, што з цягам часу словы атрымаюць пацвярджэнне:
«Яшчэ раз кажу, мы не бачылі, хто гэта рабіў, і якія там інструкцыі яны атрымлівалі. Але я думаю, што з часам усё таемнае становіцца відавочным. Хоць, вядома, вось гэтыя вось кіраўнікі бота-фермы, яны, у адрозненне ад наіўных навукоўцаў не публікуюць падобнага роду справаздачы інфармацыі ў навуковых часопісах ці ў прэсе».
«Донары табе даюць грошы на падтрымку сродкаў масавай інфармацыі, ты робіш нейкую заяву ў сетцы (памятаеце, як у Вячоркі, там, мільён праглядаў). Ён кідае грошы, там, 50 тысяч з гэтых сродкаў, накручваючы сабе вось гэтымі ботамі прагляд. Потым ён прад'яўляе гэта донарам, паказвае, глядзіце, які я папулярны. Далей пайшло вось гэтае, так бы мовіць, кола зарабляння грошай», — разважаў Цапкала.
На беларусаў, па словах палітыка, «гэта не працавала, таму што беларусы ведаюць цану вось гэтым усім прайдзісветам, ведаюць, як усё працуе», а вось на донараў, якія «не ўнікаюць» і» не разумеюць нюансаў такой работы», мела ўплыў.
«Выступае гэта вось, так бы мовіць, лідарка нацыянальная, як яна сябе назвала, калі ў Вільні апынулася, вось глядзіце, яе там мільёны праглядаў. (…) Вось гэтае махлярства, яно насамрэч працуе, працавала на Захад, але яно ніякага ўплыву на ўнутрыпалітычную сітуацыю ў Беларусі не аказвала, таму што, яшчэ раз падкрэсліваю, усе цудоўна разумеюць, што гэта за фрукты».
Каментары
сами по себе полные нули, политические трупы, но из кожи вон лезут, чтобы изобразить величину путем принижения остальных.
Не чапайце, Сьвятлану, дэмсілы. Калі і ёсць у вас што легітымнае, - дык гэта яна.