Жыхар Лагойска знайшоў даляры ў фотаальбоме бабулі і зарабіў крымінальную справу
Жыхар Лагойска звярнуўся ў адзін з банкаў горада, каб абмяняць даляры. Ён прынёс дзве купюры — на 50 і 100 даляраў.
У супрацоўніка банка паўсталі сумневы ў сапраўднасці валюты, і банк паведаміў пра гэта ў міліцыю. Экспертыза пацвердзіла падазрэнні — абедзве купюры былі несапраўднымі. Аказалася, што «пяцьдзясят» — гэта пяцёрка.
Сапраўдны грашовы білет наміналам 5 даляраў быў штучна мадыфікаваны: па-над лічбай «5» наклеілі кавалачкі паперы з лікам «50», надрукаваным на звычайным прынтары. Другая купюра — «сотня» — была падробкай. Яна была выраблена не на афіцыйным прадпрыемстве, а метадам электрафатаграфічнага друку. Усе ахоўныя элементы — імітацыя.
Па словах самога мужчыны, ён знайшоў купюры ў старым фотаальбоме, які належаў яго памерлай бабулі і знаходзіўся ў вёсцы. Што яны не сапраўдныя, мужчына не падазраваў.
У дачыненні да беларуса распачатая крымінальная справа.
Каментары