«Прачнуліся ад аглушальнага хлапка, а потым зразумелі, што гарым». У Мінску маланка трапіла ў прыватны дом
Трохпавярховы катэдж на вул. Гальшанскай, 36. Тое, што ноччу 8 чэрвеня ў Зацені разгулялася страшная стыхія і пакінула пасля сябе попел і мокрыя вуглі, становіцца зразумелым, калі пераступаеш парог дома. Унутры ўсё яшчэ стаіць едкі пах гары, які адразу ж пераносіцца на адзенне і нагадвае пра сябе цэлы дзень, піша Onliner.by.
Звонку, на дагледжаным участку — горы раскіданых рэчаў, якія ўдалося ўратаваць падчас пажару. Пара — Уладзімір Аксенцьевіч і Надзея Міхайлаўна з дзецьмі, а пазней і з унукамі — пражылі ў катэджы больш за 20 гадоў і ніколі не думалі, што ўсяго за некалькі гадзін іх жыццё перакуліцца з ног на галаву.
Як стыхія змагла за адну ноч нарабіць столькі шкоды, уладальнікі катэджа дагэтуль гадаюць. Моцны хлапок, успышка — пакоі апынуліся ў дыме, яшчэ пара хвілін — і на даху з’явіліся языкі полымя, якія да прыезду ратавальнікаў паспелі знішчыць значную частку маёмасці. Пытанняў у вялікай сям’і засталося шмат, але відавочна адно: прычынай пажару ў катэджнай забудове Цэнтральнага раёна стала маланка.
— У суботу леглі спаць і дзесьці а палове першай пачулі моцны аглушальны хлапок. Святло ў доме цалкам знікла, мы падумалі, што выбіла шчыток, — успамінае Надзея Міхайлаўна. — Праз пару хвілін адчулі рэзкі пах дыму: убачылі, што ён паваліў аднекуль зверху. Надзя (дачка пенсіянераў) пабегла ў пакой да ўнукаў, яны якраз жылі на трэцім паверсе. Тут жа зразумела: дах гарыць адкрытым полымем, трэба хутчэй ратаваць родных і бегчы з дому на вуліцу.
Арцём, муж Надзі, яшчэ не ўсведамляючы маштабаў катастрофы, паспрабаваў самастойна патушыць агонь, які паспеў з даху перакінуцца на адзін з пакояў.
— Я схапіў вогнетушыцель, пабег наверх, думаў, што змагу справіцца з полымем, — далучаецца да размовы Арцём. — Адкрыў дзверы — агонь пайшоў на мяне воблакам. Не ведаю, колькі часу правёў наверсе, але дакладна памятаю, як у нейкі момант ногі пачалі адмаўляць. Зразумеў, што губляю прытомнасць. Мяне адвезлі ў бальніцу і адкачалі за ноч. У панядзелак раніцай вярнуўся дадому і дагэтуль не магу паверыць у тое, што адбылося.
Надзя кажа, што пажарных выклікалі даволі хутка, праўда, па словах жанчыны, патушыць полымя ратавальнікі змаглі толькі праз гадзіну. Бліжэй да ранку сям’я змагла ацаніць памер шкоды: аказваецца, пацярпеў не толькі трохпавярховы дом, але і прыбудова на ўчастку (у ёй стаяў радыёпрыёмнік, які ад разраду літаральна разарвала на кавалкі). Разам з ім, кажуць жыхары, абрынулася адна са сцен прыбудовы. Але і гэта яшчэ не ўсё.
— Мы дагэтуль не можам зразумець траекторыю ўдару маланкі. Ёсць здагадка, што яна трапіла ў антэну на даху. Громаадвод у нас адсутнічае, — працягвае мінчанка. — Неяк у выніку электрычнага разраду ад дома адкалоўся кавалак бетону: ён праламаў наш плот і адляцеў у суседні дом. Удар быў настолькі моцны, што бетонныя кавалкі апынуліся на супрацьлеглым баку суседняга ўчастка. Хто цяпер будзе кампенсаваць шкоду — невядома. Страхоўка пакрые ў лепшым выпадку 50% ад сумы, астатняе давядзецца неяк аднаўляць сваімі сіламі.
У гэтай гісторыі варта аддаць належнае суседзям па вуліцы, якія не пакінулі сям’ю сам-насам з бядой. Па словах Арцёма, людзі прыходзяць, каб дапамагчы: хто матэрыяламі, хто грашыма, а хто проста добрым словам.
— Мы з дзецьмі часова пераехалі да суседзяў, — працягвае Надзея. — Бацькі адмовіліся пакідаць дом, расклалі матрацы і пераначавалі на першым паверсе. Святла ў доме няма, халадзільнік, тэлевізар, бойлер — усё выйшла са строю. У іншых дамах на вул. Гальшанскай таксама не працуе частка бытавой тэхнікі. Відаць, таму што маланка трапіла яшчэ і ў электрычны шчыток на вуліцы, які ў тую ноч таксама загарэўся адкрытым полымем.
— У нас у доме газавы кацёл згарэў, — кажа сусед Яўген. — У адзін з пакояў у нас заведзены аптавалаконны кабель, ён схаваны ў пластыкавую скрынку. Пасля ўдару маланкі ў шчыток крышка адляцела ў супрацьлеглы бок пакоя, уся ўнутры чорная.
Дзяніс, яшчэ адзін уладальнік катэджа па вул. Гальшанскай, таксама застаўся без электрычнасці. Каб патрапіць у дом, мужчына вымушаны пералазіць цераз плот: электразамок у калітцы выйшаў з ладу.
Цяпер жыхары дома па вул. Гальшанскай, 36, патроху прыходзяць у сябе і разам ліквідуюць наступствы стыхіі. Стадыя панікі і прыняцця сітуацыі ўжо пазаду, наперадзе — маштабны рамонт. Пенсіянеры стараюцца не падаць духам і толькі адмахваюцца: «Галоўнае — усе жывыя». Дачка Надзя адкрыла дабрачынны рахунак, таму, калі вы хочаце дапамагчы сям’і, можаце напісаць ёй сюды.
Паводле інфармацыі прэс-сакратаркі МНС Мінска Вольгі Мельнічэнкі, паведамленне пра пажар у прыватным доме па вул. Гальшанскай паступіла на нумар 112 у 01:03. Пажар быў ліквідаваны работнікамі МНС у 01:41. Устаноўлена, што адбылося загаранне маёмасці ў мансардным памяшканні і даху жылога дома на плошчы 70 квадратных метраў.
Пашкоджана маёмасць, а таксама драўляныя элементы даху. Прычына здарэння на дадзены момант высвятляецца. Найбольш верагодная версія — удар маланкі.
Каментары