Паводле французскага выдання Intelligence Online, прэзідэнт Інданезіі Прабова Субіянта нечакана завітаў у Мінск пасля візіту ў Францыю магчыма, для таго, каб дамовіцца пра закупкі зброі, піша Reform.news.
Перад гэтым Прабова Субіянта ўдзельнічаў у святкаванні 14 ліпеня ў Парыжы як ганаровы госць, але пасля адмовіўся ад запланаванай вячэры з прадстаўнікамі французскіх абаронных кампаній, спаслаўшыся на «адсутнасць новых кантрактаў». Такое рашэнне здзівіла французскі бок, хоць афіцыйна яно было названа «зменай фармату».
Асобным раздражальнікам у адносінах з Францыяй стаў ціск з боку Парыжа з мэтай прымусіць Інданезію прызнаць Ізраіль — гэта выклікала незадаволенасць у інданезійскага лідара. У выніку ягоны візіт у Францыю прайшоў у сціплым фармаце — з кароткай сустрэчай з Эмануэлем Макронам.
На фоне астывання сувязяў з Францыяй Інданезія актыўна дыверсіфікуе сваіх абаронных партнёраў. Замест французскіх самалётаў-знішчальнікаў Rafale краіна закупляе кітайскія J-10 і рыхтуе сваіх пілотаў да навучання ў Кітаі. Абмяркоўваюцца і закупкі кітайскіх падводных лодак.
Таксама адбываецца замена французскіх ракет Exocet на турэцкія аналагі ад кампаніі Roketsan, вядзецца супрацоўніцтва з ААЭ і Італіяй.
Асаблівую ўвагу французскія журналісты звяртаюць на тое, што пасля Парыжа Прабова Субіянта адразу накіраваўся ў Мінск. Паводле Intelligence Online, ён можа разлічваць на хуткую куплю беларускіх узбраенняў.
А ўлічваючы, што Беларусь не прадае зброю без узгаднення з Расіяй, гэты візіт выглядае вельмі адчувальным для Францыі, якая ў сваёй новай стратэгіі адкрыта назвала Расію доўгатэрміновай пагрозай.
Сам Прабова Субіянта афіцыйна патлумачыў візіт у Беларусь нібыта перамовамі па ўгнаеннях.
Цяпер чытаюць
Вызваленым і дэпартаваным ва Украіну палітвязням не аддалі пашпарты3
Каментары
[Зрэдагавана]