На Гродзеншчыне пабачылі незвычайнага бусла. Не белы і не чорны, а шэры ФОТАФАКТ
Незвычайнага бусла 10 жніўня заўважыла Святлана Панькова на полі каля трасы Гродна-Ліда. І гэта не чорны бусел, а белы бусел з незвычайнай афарбоўкай, піша тэлеграм-канал «Дзікая прырода побач».
Жанчына піша:
«Убачыўшы такога чарнявенькага бусла, узрадавалася: О! Чорны бусел! Прыгледзеўшыся, зразумела, што не ён… Потым падумала, што гэта звычайны бусел так выпэцкаўся. Але не, настолькі ідэальна не выпэцкаешся. Гэта была такая афарбоўка!
Звычайныя белыя буслы падляталі да яго з цікавасцю і тут жа шарахаліся ад яго… Гэты бусел-мулат так і трымаўся асабняком… Чарада яго не прыняла… А ўвогуле, чаго толькі прырода не створыць!»
Спецыялісты мяркуюць, што гэта рэдкая колеравая аберацыя (мутацыя). Магчыма, у птушкі меланізм — празмерная колькасць чорнага пігменту (меланіну) у пёрах, што дае шэрае або дымчатае адценне замест белага.
Каментары