Міжнародныя эксперты ацанілі расійскі кантынгент на вучэннях «Захад-2025»
Міжнародная ініцыятыва iSANS апублікавала аналіз сітуацыі вакол сумесных беларуска-расійскіх вучэнняў «Захад-2025», якія праходзяць з 12 да 16 верасня. Эксперты ацанілі колькасць і склад расійскага кантынгенту, што ўдзельнічае ў манеўрах на тэрыторыі Беларусі, піша Reform.news.
Паводле звестак экспертаў, у Ліду прыбылі два расійскія знішчальнікі Су-30 і шэсць франтавых бамбавікоў Су-34, а на аэрадроме ў Мачулішчах размясціліся яшчэ пяць верталётаў. Яшчэ ў жніўні былі перакінутыя падраздзяленні 4-й танкавай дывізіі.
Пры гэтым у Беларусі ўжо знаходзіліся вайскоўцы 71-й мотастралковай і 98-й паветрана-дэсантнай дывізій, якія ўдзельнічалі ў вучэннях АДКБ «Узаемадзеянне-2025». Калі ўлічыць іх, агульная колькасць расійскіх вайскоўцаў, задзейнічаных у вучэннях, складае прыкладна 400 чалавек.
Эксперты падкрэсліваюць, што ў параўнанні з вучэннямі «Захад-2021» цяпер няма маштабнага перакідання войскаў: аб’ём эшалонаў з тэхнікай і асабовым складам у дзесяць разоў меншы.
Да вучэнняў таксама далучаныя беларускія войскі: механізаваныя, артылерыйскія, радыёэлектроннай барацьбы, матэрыяльнага забеспячэння, а таксама авіяцыйныя і зенітна-ракетныя падраздзяленні. Асноўныя месцы правядзення манеўраў — палігоны «Барысаўскі» (дзе пройдзе актыўная фаза) і «Лясішча» ў Слуцкім раёне, умацаваныя раёны на Ваўкавыскім і Смаргонскім кірунках. Задзейнічаныя таксама аэрадромы ў Баранавічах, Мачулішчах, Лідзе, яшчэ адзін участак аўтадарогі выкарыстоўваецца як палявы аэрадром. Паводле Мінабароны Беларусі, вучэнні праводзяцца на палігонах у глыбіні і на ўсходзе краіны.
У аглядзе iSANS прыводзіцца інфармацыя пра інцыдэнт з беспілотнікамі: у ноч з 9 на 10 верасня не менш за 19 расійскіх дронаў заляцелі ў паветраную прастору Польшчы. Адначасова ў Беларусі было зафіксавана каля 27 беспілотнікаў, з якіх да сямі маглі таксама пераляцець мяжу. Для перахопу ўздымаліся знішчальнікі і верталёты.
Паводле ацэнак экспертаў, найбольш верагодна, што пасля заканчэння «Захаду-2025» расійскія вайскоўцы будуць выведзеныя з Беларусі назад у Расію. Пры гэтым агрэсія супраць Украіны ці краін НАТА лічыцца малаверагоднай.
Але рызыка правакацый захоўваецца — магчымыя кароткатэрміновыя парушэнні паветранай прасторы, выкарыстанне беспілотнікаў або іншыя падобныя дзеянні.
Літоўская армія: Рызыка нападу падчас вучэнняў «Захад» нізкая, але верагоднасць правакацый узрасла
Сёння пачынаюцца беларуска-расійскія вучэнні «Захад-2025»
Польшча закрыла мяжу з Беларуссю
МЗС Расіі запатрабавала ад Польшчы не закрываць мяжу з Беларуссю і намякнула на наступствы
Польшча разгортвае на мяжы з Беларуссю 40 тысяч вайскоўцаў
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў79
Каментары