У 10‑мільённым Тэгеране дэфіцыт вады. Жыхароў папярэдзілі пра магчымую эвакуацыю
Засуха ў Іране дасягнула катастрафічных маштабаў: калі да канца месяца не пойдзе дождж, то ўлады абяцаюць увесці нармаванне вады, а калі не будзе даўжэй — эвакуіраваць Тэгеран.
Пра гэта заявіў 7 лістапада прэзідэнт Ірана Масуд Пезешкіян, перадае выданне Bild.
Асноўная крыніца пітной вады для Тэгерана — вадасховішча Амір-Кабір — «змяшчае толькі 14 мільёнаў кубаметраў вады, што складае восем працэнтаў яго ёмістасці», паведаміў адказны за водазабеспячэнне Тэгерана Бехзад Парса. Пры такім узроўні горад зможа забяспечваць сябе вадой толькі «на працягу двух тыдняў», — папярэдзіў ён.
У Тэгеране жыве больш за 10 мільёнаў чалавек, і ён штодня спажывае каля 3 мільёнаў кубаметраў вады. У якасці меры эканоміі, паводле паведамленняў, у апошнія дні ў некалькіх раёнах Тэгерана часова спыняецца падача вады; перабоі адбываліся і ўлетку.
Можа быць яшчэ горш
Цэнтр па вывучэнні Блізкага Усходу і глабальнага парадку (CMEG) у сваім апошнім аналітычным дакладзе Iran and Regional (In-)Stability & Security Briefing (IRIS) прайшоў да высновы, што крызіс водных рэсурсаў у Іране закранае не толькі вадасховішчы, але і «разбураныя водна-балотныя ўгоддзі і знясіленыя падземныя ваданосныя пласты краіны».
Акрамя таго, няма ніякіх прыкмет таго, што «іранскае кіраўніцтва мае намер змяніць свой курс» і заняцца інвестыцыямі ў інфраструктуру, таму сітуацыя, паводле ацэнак экспертаў, «будзе працягваць пагаршацца».
У дакладзе падкрэсліваецца, што раней «экалагічны крызіс часта станавіўся прычынай палітычных пратэстаў супраць рэжыму і яго ўлады». Таму сітуацыя з вадой, магчыма, будзе мець і палітычныя наступствы.
Цяпер чытаюць
Полк Каліноўскага паведаміў пра гібель трох байцоў2
Каментары