Раней гэтую пасаду займаў Сяргей Скрабец, які цяпер працуе рабочым па абслугоўваньні жылых булынкаў.
Паводле намесьніка начальніка калёніі па ідэалягічнай працы, зьняволены Казулін трапіў у адну з лепшых выпраўленчых устаноў на Беларусі
Калёнія «Віцьба-3» адмыслова прызначаная для ўтрыманьня зьняволеных, якія адбываюць першы тэрмін пакараньня . Яна месьціцца за 9 км ад Віцебску. Раней гэта была папраўчая калёнія для падлеткаў, а цяпер яе пераабсталёўваюць і рамантуюць: у адміністрацыйным будынку ўстаўляюць плястыкавыя шклопакеты, тынкуюць сьценкі, прыбіраюць у двары.
Аляксандра Казуліна даставілі туды сёньня ўраньні. Намесьнік начальніка калёніі па ідэалягічнай працы Клім Коваль распавёў журналістам і віцебскаму праваабаронцу Леаніду Сьвеціку, што з гэтым зьняволеным ён яшчэ не сустракаўся, але ўжо знаёмы з ягонай справай.
Спадар Коваль паведаміў таксама, што Аляксандар Казулін, верагодней за ўсё, будзе накіраваны на працу ў бібліятэку. Раней гэтую пасаду займаў Сяргей Скрабец, які цяпер працуе рабочым па абслугоўваньні жылых булынкаў.
Некаторы час бібліятэка стаяла зачыненай, бо, паводле начальніка калёніі па ідэалягічнай працы, тутэйшыя ўтрыманцы ня дужа цікавяцца літаратурай – да прыезду Аляксандра Казуліна сярод амаль 700 зьняволеных было толькі два чалавекі з вышэйшай адукацыяй. Цяпер стала трое, і ня выключана, што менавіта зняволенаму прафесару, доктару навук, акадэміку Акадэміі адукацыі Рэспублікі Беларусь, ганароваму прафесару Маскоўскага дзяржаўнага ўніверсітэта імя М.Ламаносава будзе давераны турэмны кніжны фонд калькасьцю 5 з паловай тысяч паасобнікаў.
Пытаньне працаўладкаваньня Аляксандра Казуліна канчаткова будзе вырашана адміністрацыяй калёніі «Віцьба-3» праз два тыдні – калі зьняволены адбудзе так званы «карантын» пад наглядам медыкаў.
Тое самае намесьнік начальніка калёніі паўтарыў і дачцы зьняволенага палітыка Юліі Казулінай, якая таксама прыехала паглядзець на тое месца, дзе будзе адбываць пакараньне ейны бацька.
(Юлія Казуліна:) «Намесьнік начальніка сказаў, што цяпер 14 дзён будзе карантын, і гэта значыць, што што нам ня будзе спатканьняў, і перадачы нельга перадаваць. Ну, сказалі, што бацька прыехаў туды з усьмешкай, вясёлы з выгляду, гэта нармальна... Мы паглядзелі на калёнію, на тамтэйшую царкву –там унутры ёсьць такая царквушка прыгожанькая. Думаю, бацьку яна спадабаецца.»
Нагадаем, што Менскі гарадзкі суд асудзіў Аляксандра Казуліна на пяць з паловай гадоў зьняволеньня. З учорашняга дня прысуд уступіў у дзеяньне.
Каментары