У Магілёве звальняюць адміністратараў за некалькі артыкулаў зь незалежных сайтаў ва ўнутранай сетцы прадпрыемства «Хімвалакно», а на Клеччыне маладую настаўніцу за «апазыцыйную» торбу і артыкул у дэмакратычным бюлетэні.
Адміністратарам унутранай кампутарнай сеткі «Хімвалакна» прапанавалі звольніцца «па асабістым жаданьні» за перадрукоўку навінаў зь сеціва на сэрвэр.
Унутраная сетка магілёўскага «Хімвалакна» была месцам, дзе карыстальнікі маглі даведацца пра навіны свайго прадпрыемства, пачытаць нацыянальныя ці сусьветныя навіны альбо проста даведацца пра прагноз надвор’я. Пару дзён таму на сайце разам з дзяржаўнымі навінамі зьявіліся і некалькі артыкулаў зь незалежных сайтаў. Адзін зь іх разказваў пра «росквіт» беларускай вёскі. Другі ж называўся «За патрабаваньне праверыць псыхічнае здароўе Лукашэнкі – 2 гады турмы». І вось за такую вольнасьць адміністратараў звальняюць «па асабістым жаданьні».
Нагадаем, што міжнародная арганізацыя «Рэпарцёры бязь межаў» назвала Беларусь адзіным эўрапейскім ворагам Інтэрнэту. Пэўна, кіраўніцтва «Хімвалакна» за ненаяўнасьцю эканамічных посьпехаў вырашыла унесьці свой ўклад у «разьвіцьцё свабоды слова» ў краіне.
Зьміцер Мышкоўскі, bulletinonline.org
❏
Вясковую настаўніцу звольнілі з працы за погляды
У Клецкім раёне з фармулёўкай «за прагул» звольнілі маладога спэцыяліста, настаўніцу ангельскай ды беларускай мовы Іну Кебікаву. Незадаволенасьць дырэктаркі школы (дарэчы, жонкі загадчыка Клецкага райана) выклікала тое, што маладая настаўніца носіць сувэнірную сумку ад Праграмы Каліноўскага.Іна Кебікава – малады спэцыяліст, у гэтым годзе скончыла БДУ па спэцыяльнасьці «настаўнік беларускай ды ангельскай мовы». Пасьля, па разьмеркаваньні, папрасілася ў Клецкі раён, бо сама з суседняй вёскі Яновічы. На працу ў Грыцэвіцкую школу, куды Іну накіравалі з раённага аддзела адукацыі, дзяўчына вымушана была дабірацца 12 кілямэтраў на ровары.
Сям’я Кебікавых у раёне вядомая сваімі апазыцыйнымі поглядамі. Іна разам са сваёй сястрой Тацянай былі ў намётавым гарадку на плошчы. Пасьля чаго сястру выключылі з БДУ, і цяпер яна навучаецца ў Польшчы па Праграме Каліноўскага.
Як паведаміў карэспандэнту belngo.info мясцовы грамадзкі актывіст Сяргей Панамароў, днямі выйшаў чарговы нумар дэмакратычнага бюлетэню «Бойкі Клецк», адзін з цэнтральных матэрыялаў якога прысьвечаны факту перасьледу Іны Кебікавай.
Паліна Васілёва, belngo.info
Цяпер чытаюць
Анатоль Котаў ужо выязджаў у Турцыю і лічыў яе бяспечнай — крыніцы5
Каментары