Більт перасцярог Лукашэнку ад выкарыстання тэракту для ціску на апазіцыю
Гэта будзе абавязкова заўважана на Захадзе, кажа кіраўнік шведскага МЗС.
Міністр замежных спраў Швецыі Карл Більт выказаў заклапочанасць тым, што беларускія ўлады могуць «павесіць» выбухі ў мінскім метро на прадстаўнікоў Захаду ў прапагандысцкіх мэтах.
«[Лукашэнка] кажа, што арыштаваў гэтых людзей, і ведае, хто яны, так што можна чакаць, што ён выкажацца па гэтых пытаннях у найбліжэйшы час, - сказаў Більт 14 красавіка ў Берліне ў інтэрв'ю брусэльскаму сайту EUobserver. - Але мы можам асцерагацца горшага».
Карл Більт адзначыў, што пасля падзей 19 снежня Лукашэнка абвінаваціў Нямеччыну і Польшчу ў фінансаванні апазіцыі, якая нібыта на гэтыя грошы планавала дзяржаўны пераварот.
Шведскі міністр перасцярог Лукашэнку ад выкарыстання тэракту ў мінскім метро для далейшага ціску на палітычных апанентаў.
Карл Більт назваў «дрэнным знакам» агрэсіўны тон Лукашэнкі ў тэлевізійным выступе 13 красавіка.
На нарадзе 13 красавіка Лукашэнка, нагадаем, адзначыў, што саўдзельнікі і замоўцы тэракту ў метро ўсё яшчэ адшукваюцца. «Можа быць, гэтыя так званыя палітыкі ад пятай калоны нам раскрыюць карты і пакажуць, хто ж замовіў? Можа, хтосьці і з улады? Усіх дапытаць. У межах крымінальнай справы ўсіх прыцягнуць і дапытаць, не зважаючы ні на якую дэмакратыю і выццё і стогны замежных пакутнікаў», - сказаў афіцыйны беларускі лідар.
«Ён вельмі пагардлівы да Захаду, да правоў чалавека, да апазіцыі. Ствараецца ўражанне, што ён успрымае выбух як падставу для далейшых рэпрэсіяў,- лічыць Карл Більт. - Існуе новы ўзровень страху [сярод актывістаў апазіцыі ў Беларусі], што даволі натуральна, калі яны чуюць гэтую рыторыку Лукашэнкі. Яны асцерагаюцца, што гэта можа ўваходзіць у яго намеры».
«
З здарэннямі такога роду [тэракт у метро] варта паступаць у адпаведнасці з вяршэнствам закона. Ствараць атмасферу запалохвання і страху - не спосаб кіраваць краінай, нават не спосаб спраўляцца з тэрарыстычнымі пагрозамі.Ён павінен ведаць, што мы будзем назіраць. Калі ён выкарыстоўвае гэта як падставу для далейшай актывізацыі рэпрэсіяў, гэта будзе абавязкова заўважана», - заявіў шведскі міністр.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім17
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3636
Каментары