У Баранавічах выклікаюць у міліцыю ўдзельнікаў Народнага сходу, які прайшоў у горадзе 8 кастрычніка.
Як паведаміў кіраўнік Баранавіцкай гарадской арганізацыі руху «За Свабоду» Віктар Сырыца, раніцай 4 лістапада яму патэлефанаваў супрацоўнік міліцыі і запрасіў прыйсці ў гэты ж дзень у гарадскі аддзел унутраных спраў.
«Там у мяне пыталіся аб маім удзеле ў Народным сходзе. Я не ўтойваў, што браў удзел у яго падрыхтоўцы і правядзенні. Пры гэтым заявіў, што ён быў праведзены ў адпаведнасці з законам аб рэспубліканскіх і мясцовых сходах, — сказаў Сырыца. — Спачатку ў міліцыі склалі пратакол апытання, затым адміністрацыйны пратакол у дачыненні да мяне за арганізацыю і ўдзел у несанкцыянаваным масавым мерапрыемстве. Пасля гэтага ўручыў позву ў суд на 10 лістапада».
4 лістапада ў міліцыю таксама выклікалі баранавіцкага актывіста Аб’яднанай грамадзянскай партыі (АГП) Рыгора Грыка.
Паводле яго слоў, 3 лістапада ён атрымаў позву, з якой вынікала, што ён павінен з’явіцца ў Баранавіцкі ГАУС у якасці сведкі.
«У міліцыі мне не сказалі, па якой справе я праходжу як сведка, — адзначыў Грык. — Усе пытанні, якія мне задавалі, тычыліся Народнага сходу, які прайшоў у нашым горадзе 8 кастрычніка. У прыватнасці, адкуль я пра яго даведаўся, чаму прыйшоў на яго. Я пайшоў з міліцыі пасля таго, як падпісаў пратакол апытання. Яно доўжылася прыкладна 15 хвілін».
На думку Сырыцы,
такім чынам мясцовых актывістаў спрабуюць запужаць перад запланаваным у Баранавічах на 12 лістапада чарговым Народным сходам.
«Я таксама не выключю, што арганізатараў сходу могуць пасадзіць на суткі, каб ізаляваць на час правядзення сходу», — заявіў Сырыца.
Каментары