Юрый Чыж: Я не супраць, каб «Дынама» купілі, але ахвотных запрэгчыся ў гэта ярмо няма

Старшыня назіральнага савета футбольнага клуба «Дынама» Юрый Чыж спакойна ставіцца да заяваў, што яму неабходна прадаць клуб дзеля яго выратавання.

«Дык дзеля Бога, няхай хтосьці прыйдзе і купіць. Дзесяць гадоў я гэта чую, але жадаючых сёння запрэгчыся ў гэты ярмо добраахвотна няма. Хтосьці можа лепш — няхай, дзеля Бога, у мяне комплексаў па гэтым пытанні няма», — заявіў Чыж.

Ён паведаміў, што рашэнне прызначыць галоўным трэнерам цяперашняга настаўніка «Белшыны» Аляксандра Сяднёва з’яўляецца канчатковым. «Мы выбіралі яго не з адной кандыдатуры, — сказаў Чыж. — Імпануе яго мэтанакіраванасць, жаданне працаваць і рабіць вынік з таго, што ёсць. Ён працуе над сабой, вучыцца. Сёння рэдкія спецыялісты, якія шукаюць, спрабуюць, корпаюцца ў сабе, працуюць над сваёй капіталізацыяй як трэнера. Пытанне, ці зможа ён справіцца з нашымі магчымасцямі, якія будуць прадастаўлены, каб гэта не расхалоджвала, не расслабляла».

Паводле слоў Чыжа, плануецца пакінуць у камандзе гульцоў, якія паказалі сябе з добрага боку, і ўмацавацца пачаткоўцамі. «Чалавек сем-восем, мы думаем, рэальна прыцягнуць з боку, плюс сваіх маладых», — сказаў ён.

Як заявіў Чыж, цяперашні галоўны трэнер Сяргей Аўчыннікаў не паставіў камандзе гульню. «Я не камплексую — другое, трэцяе або чацвёртае месца. Ён як спецыяліст не справіўся з тым узроўнем, аб’ёмам задач, якія на яго ўскладаліся. Ён не будзе трэнерам», — лічыць старшыня назіральнага савета.

Ён адзначыў, што памятаў пра выказванні знакамітага нападніка, настаўніка зборнай СССР Канстанціна Бяскова: «З брамнікаў не ўдаюцца добрыя трэнеры». «Але імпанавала яго (Аўчыннікава. — БелаПАН.) красамоўства, усё астатняе… Час, які мы прапрацавалі, прайшоў. Акрамя як самому сабе, ён больш нікому не падабаецца», — заявіў Чыж.

«Мы даем магчымасць людзям сябе раскрыць. Іншая справа, як яны з гэтым спраўляюцца. Атрымліваецца, на жаль, далёка не заўсёды», — рэзюмаваў ён.

Былы варатар зборнай Расіі Сяргей Аўчыннікаў узначаліў «Дынама» ў сярэдзіне мая гэтага года, калі каманда знаходзілася на 11-м месцы. У 10 турах, з 21-га па 30-ы (з 15 жніўня па 30 кастрычніка), каманда не пацярпела ніводнай паразы атрымаўшы шэсць перамог і чатыры разы згуляўшы ўнічыю. Затым былі два паражэнні, і за тур да заканчэння чэмпіянату «Дынама» страціла шанцы ўвайсці ў тройку прызёраў. 27 лістапада каманда гуляе на сваім полі з «Мінскам», якому пагражаюць пераходныя матчы са сталічным «Партызанам», што заняў другое месца ў першай лізе.

• 0
• 0
• 0
• 0
• 0
• 0
• 0
• 0