Выйшаў зборнік паэзіі Сяргея Законьнікава «Гэта мы».
Грамадскасць Вілейкі (Мінская вобласць) выдала зборнік паэзіі беларускага паэта і грамадскага дзеяча Сяргея Законнікава «Гэта мы».
У кнігу ўвайшлі паэмы С.Законнікава «Чорная быль», «Цівалі» і «Зязюля», напісаныя ў 1988‑1995 гадах, а таксама факсіміле лістоў народнага пісьменніка Беларусі Васіля Быкава аўтару. Калі «Чорная быль» прысвечана чарнобыльскай трагедыі, «Зязюля» — В.Быкаву, то «Цівалі» — трагедыі беларускага народа ў перыяд сталінізму.
У інтэрв’ю БелаПАН паэт паведаміў, што ў пачатку 1990‑х гадоў яму стала вядома аб трагедыі, якая адбылася ў вёсцы Цівалі, што цяпер уваходзіць у рысу Мінска (раён кінатэатра «Аўрора» на вуліцы Прытыцкага. — БелаПАН.). Паводле яго слоў, у 1938 годзе па загадзе сталінскага наркама пуцей зносінаў Лазара Кагановіча «за сабатаж» — адмову адпраўляць эшалоны рэпрэсаваных у Сібір і Запаляр’е — былі расстраляны каля 300 беларускіх чыгуначнікаў з розных гарадоў. Каб утаіць злачынства, іх целы былі закапаны ў жывёламогільніку ў Цівалі. Па санітарных нормах, такія могільнікі нельга раскопваць на працягу 100 гадоў. Аднак у 1960‑я гады ў сувязі з пашырэннем сталіцы ў раёне Цівалі пачалося будаўніцтва і могільнік планавалася знішчыць. Ваеннаслужачыя Беларускага палка ўскрылі могільнік і сярод касцей жывёл знайшлі прастрэленыя чэрапы людзей і іх астанкі, скручаныя калючым дротам. Па загадзе зверху астанкі людзей і жывёл былі спалены напалмам і пахаваны ў лесе каля дарогі на Ракаў. «Пра гэта я і напісаў у сваёй паэме, перакладзенай на многія замежныя мовы», — сказаў паэт.
Лаўрэат Дзяржаўнай прэміі Беларусі імя Янкі Купалы і шэрагу міжнародных прэмій С.Законнікаў з’яўляецца аўтарам 15 кніг паэзіі, эсэ, публіцыстыкі і нарысаў. Асобныя яго кнігі выдадзены ў Маскве, Варшаве і Сафіі. Многія вершы перакладзены на замежныя мовы. Літаратар пераклаў на беларускую мову творы паэтаў Украіны, Балгарыі, Германіі, Польшчы, Літвы. Узнагароджаны медалём «За ратаванне тапельцаў на вадзе» (1960) і ордэнам «Знак пашаны» (1984).
Да «Дня народнага адзінства» памілавалі 25 чалавек4
Каментары