Навіны культуры
Рагнеда для дзяцей
У Тэатры юнага гледача пазаўчора адбылася прэм’ера спэктаклю «Палачанка». Драматург Аляксей Дудараў і рэжысэр Андрэй Андросік вызначылі пастаноўку як «трагічную легенду». Рагнеду іграе Людміла Волкава, а князя Ўладзімера — Сяргей Курыленка. Аўтар сцэнаграфіі — слынны Барыс Герлаван, стылізаваная пад старадаўнюю музыка — Уладзімера Кандрусевіча.
Ізраільскі жывапіс
Галерэя «Брама» наладзіла ў сталічным Доме дружбы выставу шыкоўных рэпрадукцыяў 11 ізраільскіх мастакоў-клясыкаў. Гэбрайскі жывапіс зьявіўся толькі ў XX ст. і нават цяпер застаецца даволі маргінальнай зьявай у сябе на радзіме, бо супярэчыць канонам юдаізму.
Клясыка
У Швэйцарыі выйшлі два кампакт-дыскі ансамблю салістаў «Клясык-Авангард»: «Адкрыцьці зь Беларусі» й «Клясык-Авангард плюс...» На іх — авангардныя творы старых расейскіх аўтараў і сучаснага беларускага кампазытара Вячаслава Кузьняцова. Творы гэтыя прагучалі 8 лютага ў Залі камэрнай музыкі. Паводле словаў кіраўніка адміністрацыі швайцарскага пасольства ў РБ сп.Казэры, большасьць беларусаў, якія езьдзяць у альпійскую рэспубліку, — гэта музыкі.
Воўчак пайшоў у адстаўку
Старшыня Саюзу кінематаграфістаў Ігар Воўчак пайшоў у адстаўку ў знак пратэсту супраць дзяржаўнае палітыкі, якая прывяла да развалу беларускага кіно. На прэс-канфэрэнцыі рэжысэр Юры Гарулёў параўнаў студыю «Беларусьфільм» з разбамблёным Грозным. За апошнія 4 гады фінансаваньне здымак скарацілася ўтрая, адпаведна зьменшылася і вытворчасьць. Сярэдняя зарплата на «Беларусьфільме» складае крыху больш за 20 даляраў. Некалькі цэхаў студыі ўжо зусім не працуюць з прычыны зношанасьці абсталяваньня. Сёлета на «Беларусьфільме» не здымаецца ніводная карціна. Канца крызысу ня бачна.
Чужы авангард
У Нацыянальным Мастацкім музэі праходзіць выстава графікі мастака-дысыдэнта з колішняй ГДР Гергарда Альтэнбурга — ён быў пакараны двума гадамі зьняволеньня за перасылку сваіх працаў на Захад. Ягоныя выявы людзей складзеныя з плямаў ці набору нібыта выпадковых рысак. Калі б у такой тэхніцы працаваў беларускі мастак, у наш Нацыянальны музэй яго б і блізка не пусьцілі. А так у адкрыцьці выставы ўзяў удзел міністар культуры А.Сасноўскі, сказаўшы загадкавую фразу пра тое, што Нямеччына — галоўны замежны партнэр Беларусі ў галіне культуры.
Юрась Барысевіч
Каментары