Навіны
Зорка Вэнэра
На кінастудыі «Беларусьфільм» пачаліся здымкі поўнамэтражнага мастацкага фільма «Зорка Вэнэра». Галоўны герой стужкі — не Максім Багдановіч, як можна было б падумаць паводле назвы, а сучасная постчарнобыльская моладзь. Сцэнар напісаў кінадраматург Віктар Казько, які днямі адсьвяткаваў свае 60-я ўгодкі. Рэжысэр «Зоркі Вэнэры» Маргарыта Касымава спадзяецца, што фільм будзе завершаны ўжо ў верасьні і патрапіць на Міжнародны кінафэстываль у Таронта. Паэт Генадзь Бураўкін паабяцаў напісаць адмыслова для гэтай карціны некалькі вершаў.
Палац Паскевіча: рэстаўрацыя талакою
Гомельскі аблвыканкам зьвярнуўся да жыхароў гораду з заклікам дапамагчы рэстаўрацыі палацу графа Паскевіча. Бюджэтных сродкаў на адбудову помніка катастрафічна не стае. Гарадзкія ўлады плянуюць, што ахвяраваньні прадпрыемстваў і прыватных асобаў складуць ажно 70% ад кошту рэстаўрацыі — 835 мільёнаў рублёў. Гарвыканкам абяцае, што палац Паскевіча будзе адноўлены да канца году, але самі рэстаўратары ў гэтым моцна сумняюцца.
Сярэднявечная экзотыка
Рыцарскі ордэн «Сэрца Цмока», які налічвае ў сваіх шэрагах каля ста ваяроў, наладзіў у менскім Палацы дзяцей і моладзі выставу старажытнай зброі, створанай сябрамі ордэну паводле аўтэнтычных узораў. Тут можна патрымаць у руках разнастайныя мячы, арбалеты, кальчугі, штандары ды сфатаграфавацца ў вобразе праўдзівага рыцара.
Почасьці Басалыгу
У Музэі Янкі Купалы адчынілася выстава каляровых літаграфіяў Уладзімера Басалыгі, які толькі што атрымаў ганаровы дыплём Міжнароднага Купалаўскага фонду за ілюстрацыі да кніжок 11 паэтаў-ляўрэатаў Літпрэміі імя Янкі Купалы. Выстава складаецца зь дзьвюх сэрыяў: першая прысьвечана літарам для нацыянальнае азбукі, другая — помнікам дойлідзтва Беларусі (стварыць яе мастака натхніў яшчэ Караткевіч). Цяпер Басалыга плянуе працягнуць гэтую сэрыю выявамі ўжо няісных, зруйнаваных сьвятыняў Беларусі.
Сваволя ў Гомелі
Новы Фронт Мастацтва і Задзіночаньне Беларускіх Студэнтаў наладзілі ў гомельскім Доме культуры глухіх фэстываль пэрфомансаў «Дзень муміфікатара». Удзел бралі менскія і латвійскія літаратары, рок-гурты «Навыварат» (Берасьце), «Бан-Жвірба» (Гомель), «Барадаты Грынвіч» і «Сонца-Кветкі» (Менск), а таксама Тэатар Псыхічнае Неўраўнаважанасьці. Лепшым муміфікатарам артысты завочна прызналі былога лектара Таварыства «Веды» Аляксандра Лукашэнку, які здолеў закансэрваваць амаль цэлую краіну.
Юрась Барысевіч
Цяпер чытаюць
«Дзеці растуць з адчуваннем, што быць беларусам пачэсна, як выпускніком Гарварда». У Батумі дзейнічае беларускамоўная школа — вось як гэта працуе2
«Дзеці растуць з адчуваннем, што быць беларусам пачэсна, як выпускніком Гарварда». У Батумі дзейнічае беларускамоўная школа — вось як гэта працуе
«Калі Расія нападзе на NATO, Калінінград будзе знішчаны ў першыя ж гадзіны. Але могуць прайсці два тыдні, перш чым дадатковыя сілы прыбудуць у Літву» — генерал Бэн Ходжэс2121
Каментары