Лісты ў рэдакцыю
Бярэзань, а не Беразіно
Вельмі прыемна, што вашая газэта ўжывае назвы нашых гарадоў, мястэчак і вёсак у няспольшчаным і незрасейшчаным варыянце.
Здаецца, адзіны горад, які вы пішаце скажона, гэта Беразіно. Наколькі мне вядома, раней гэтае мястэчка мясцовыя жыхары называлі Бярэзань.
Алесь Ступень, Горадня
Апаганены помнік, падпісана – “зубрамі”
Сёньня праходзiў праз старыя габрэйскiя могiлкi i быў вельмi ўзрушаны.
З боку вулiц Сухой i Калектарнай, якраз дзе раней быў уваход на могiлкi, у сярэдзiне 90-х усталявалi два камянi-помнiкi закатаваным у час вайны габрэям. Цяпер гэта адзiныя помнiкi на ўсе могiлкi. Астатнiя былi зруйнаваныя недзе у 80-м. Мая бабуля-нябожчыца, казала, што ў час вайны побач з могiлкамi праходзiў роў. У яго немцы накiдалi шмат забiтых габрэяў i засыпалi. Нейкi час, яна казала, можна было бачыць, як варушылася глеба. Наша хата знаходзiлася побач, i таму яна бачыла, што тамака адбывалася.
Адзiн з тых помнiкаў цяпер нехта размаляваў чырвонай фарбай. Зрабiлi сымбалiчную выяву бел-чырвона-белага сцяга, шасьцiкутную зорку, надпic з памылкай – “Забей жыда!”, падпiсаўшыся – “ЗУБР”.
Вельмi шкада, што сапсавалi добры помнiк. Увесь час там былi кветкi. Даволi часта я бачыў габрэйскiх дзетак, якiя адкопвалi i зносiлi да гэтых помнiкаў раскiданыя па усей акрузе ацалелыя ад могiлак камянi з надпiсамi. Калi я запытаўся, навошта яны гэта робяць, пачуў адказ: тут пахаваныя нашыя продкi, i трэба, каб на могiлках быў хоць нейкi парадак. Але тое, што адбылося сёньня, – ня простае хулiганства. Гэта, на жаль, i палiтыка.
Мы мусiм баранiць ня толькі Курапаты.
Хутка Дзяды, i, на мой погляд, нельга замоўчваць гэтую справу.
Сяргей Паўзун, Менск
Ад рэдакцыі: Ня верым, што гэта зрабілі “зуброўцы”. Гэта можа быць адна з тых правакацыяў, на якія майстры — іхныя палітычныя апанэнты. Але добра было б, каб якраз “зуброўцы” на Дзяды гэтае чужое паскудзтва і адмылі. Хвала была б ім і гонар.
Каментары