Спакой для Курапатаў
Грамадзкія ініцыятывы “За ўратаваньне мэмарыялу Курапаты” і “Моладзь у абарону Курапатаў” зацьвердзілі канцэпцыю праекту памятнага комплексу ў Курапатах. Каб не зацягнуць справы, прапануецца скончыць абмеркаваньне да 1 траўня. На пачатку 90-х журы на чале з народным мастаком Беларусі Васілём Шаранговічам разгледзела больш як 50 праектаў, але ніводзін зь іх так і ня быў рэалізаваны з-за адсутнасьці канцэпцыі мэмарыялізацыі.
Праект канцэпцыі прадугледжвае ўстаноўку плоту вакол Курапатаў, уваходнай брамы, а таксама новых крыжоў, лаваў. Галоўнае — не парушыць спакою ямаў-магілаў, мяркуюць аўтары канцэпцыі. Таму помнік на месцы закладнога каменя не павінен быць вялікім, а храмы калі й будаваць, дык лепей разьмясьціць за межамі ахоўнай зоны.
Пасьля зацьвярджэньня канцэпцыі плянуецца абвясьціць міжнародны конкурс ужо на сам праект мэмарыялу і толькі пасьля выбару найлепшага пачаць будаўніцтва.
Пытаньне наконт крыніцаў фінансаваньня будучага мэмарыялу пакуль ня вырашанае. Стваральнікі канцэпцыі не спадзяюцца на дапамогу ўладаў (летась палата прадстаўнікоў так і ня ўнесла ў бюджэт расходаў на будаўніцтва помніка ў Курапатах) і разьлічваюць на ўсенародны збор сродкаў. Аднак яны ўсьведамляюць, што падчас стварэньня мэмарыялу давядзецца кантактаваць як зь мясцовымі ўладамі, так і зь дзяржаўнымі праектнымі інстытутамі, і мяркуюць, што гэтае супрацоўніцтва будзе пасьпяховым і зможа паспрыяць кансалідацыі грамадзтва.
Пакуль распрацоўшчыкі канцэпцыі заклікаюць усіх неабыякавых дасылаць свае прапановы на адрас: ГА “Беларуская арганізацыя працоўных жанчын”, пл.Свабоды, 23, Менск, 220030; e-mail: ngo@user. unibel.by; т.: 227-04-54, 227-13-16.
Будаўнікам кальцавой дарогі, што праходзіць праз Курапаты, нарэшце зацьвердзілі плян работы. Гэта палягчае кантроль за іхнымі дзеяньнямі з боку абаронцаў мэмарыялу.
Валанцёраў у курапацкім лягеры паменела з прычыны эпідэміі грыпу. Хворыя сыходзяць, каб не заразіць іншых. Тых, хто застаўся ва ўрочышчы, па-ранейшаму падтрымліваюць людзі з усяе Беларусі. Днямі ў лягер завітаў гарадзенскі каваль Юрась Мацко, прывёз абаронцам Курапатаў харчы. Нармалізаваліся й адносіны “палатачнікаў” з раённым лясьніцтвам, якое мела да іх прэтэнзіі.
Над намётам лунае вялізны бел-чырвона-белы сьцяг. Наконт гэтага з АМОНам дасягнуты “поўны кампраміс”. Расейскі хлопец з Мураму, што жыве ў лягеры ўжо другі месяц, пачынае гаварыць па-беларуску. “За Алімпіядай мы сочым па радыё. Калі беларуская зборная выйгравала ў амэрыканцаў зь лікам 1:0, быў такі ўздым! — расказвае Алесь па мянушцы Гетман, адзін з кіраўнікоў абаронцаў Курапатаў. — А калі нам патэлефанаваў наш хлопец Юрась і сказаў, што на трыбунах у Солт-Лэйк-Сыты ўзьнятыя бел-чырвона-белыя сьцягі, — дык і ўвогуле”.
Каментары