Беларусы мыюць грошы

Беларусы мыюць грошы

ад гандлю зброяй

У польскім тыднёвіку “Ўпрост” зьявіўся артыкул Яна Чурыловіча і Віялеты Красноўскай пра тое, як Беларусь прадае зброю ў розныя краіны сьвету.

Супастаўляючы зьвесткі з розных крыніцаў, журналісты прыходзяць да высновы, што сьляды ў гэтай справе вядуць да беларускага КДБ. Менавіта гэты орган стварыў цэлую сетку фірмаў і банкаў, якія ня толькі гандлююць зброяй і адмываюць грошы, але й перапраўляюць розныя тавары ў краіны, гандаль зь якімі кантралюецца міжнароднымі арганізацыямі. Пастаўкамі зброі і ваеннага рыштунку займаецца дзяржаўнае прадпрыемства “Белзьнештэхніка”, а таксама прыватная кампанія “Белтэхэкспарт”. Сувязі з магчымымі пакупнікамі абедзьве фірмы, магчыма, наладжваюць праз замежныя прадстаўніцтвы беларускіх заводаў — пераважна МАЗу, які мае свае філіі ў 40 краінах (у асноўным у Сярэдняй Эўропе і на Блізкім Усходзе).

У апэрацыях, зьвязаных з гандлем зброяй і іншымі падобнымі таварамі, фігуруе, як піша “Ўпрост”, “Інфабанк”, якім кіруюць блізкія паплечнікі Лукашэнкі і які зьяўляецца часткай банкаўскага холдынгу “Інфагруп”. “Інфабанк” — такі сабе каардынатар і наглядчык за гэтымі апэрацыямі. Перамяшчэньне капіталаў падчас незаконных апэрацый адбываецца праз пасярэдніцтва “Белмэталэнэрга” (даччыная фірма “Інфабанку”), а таксама кампаній “Капітал” і “Бізнэс мэнэджмэнт СА” зь сядзібай у Вене. З дакумэнтаў, да якіх мелі доступ інфарматары “Ўпросту”, вынікае, што ад гэтых кампаній сродкі перацякаюць на рахункі некалькіх соцень фірмаў, зарэгістраваных у краінах з спрыяльным падатковым кліматам, — на Кайманах, астравах Мэн, Джэрсі, Віргінскіх выспах і г.д. Адтуль яны пераводзяцца ў замежныя прадстаўніцтвы беларускіх прадпрыемстваў у якасьці платы за выкананьне папярэдне атрыманых імі фіктыўных заказаў на розныя тавары і паслугі. Большасьць гэтых прадстаўніцтваў насамрэч не займаецца ніякай гаспадарчай дзейнасьцю, сьцьвярджае “Ўпрост”. Адна з такіх фірмаў, напрыклад, — філія МАЗу ў польскім Пясэчне, дырэктар якой Юры Міхайлоўскі ня змог адказаць на пытаньне журналістаў, колькі грузавікоў яны прадалі за мінулы год.

Іншай кампаніяй, што дзейнічала ў Польшчы, была “Інтэрэкма”, заснаваная Ўладзімерам Пефціевым, пазьней адным са стваральнікаў “Белтэхэкспарту”. Калі дзейнасьцю Пефціева зацікавілася польская контравыведка, бізнэсмэн вярнуўся ў Беларусь, а празь месяц стаў шэфам філіі “Белтэхэкспарту” ў Будапэшце.

“Пасьля шэрагу міжнародных трансфэртаў практычна немагчыма высьветліць, адкуль узяліся “адмытыя” сродкі. Тым больш што беларускія фірмы прайшлі старую школу савецкага КГБ — яны не адмываюць за адзін раз буйных сумаў, працуюць максымум зь некалькімі дзясяткамі тысяч даляраў, не выклікаючы падазрэньняў у інстытутаў фінансавага кантролю. Апэрацыяў вельмі шмат, таму ў выніку адмываюцца сотні мільёнаў даляраў”, — цытуе “Ўпрост” Джона Генсьлі, шэфа брытанскага Бюро крымінальнай інфармацыі.

Грошы ад продажу зброі маглі б шматкроць павялічыць даходы дзяржавы. Аднак яны не трапляюць у бюджэт Беларусі, а асядаюць у пазабюджэтных фондах.

Паводле “Wprost”