Chvala vybaraŭ delehataŭ na kanhres demakratyčnych sił dakaciłasia narešcie da Słucku. Navučanyja papiarednimi padziejami, udzielniki schodu pravodzili jaho va ŭmovach pavyšanaj kanśpiracyi, amal jak partyzany. Bolš za paŭtary hadziny zaniało pieramiaščeńnie ad pieršapačatkovaha punktu zboru da kančatkovaha, pakul arhanizatary zvazili ludziej «na pryrodu», praviarajučy najaŭnaść chvasta.
Nie abyšłosia biez kurjoznaha vypadku. Pieršaja hrupa ludziej paśla nievialičkaha błukańnia narešcie znajšła miesca zboru. Tam užo byli padrychtavany stoł i łavy. Nieŭzabavie źjaviłasia jašče adna lehkavuška, ale kiroŭca, musić, nie zaŭvažyŭ miesca zboru (jano znachodziłasia ŭ vysokaj travie, amal u čałaviečy rost), pačaŭ razvaročvacca. Kab pakazać miesca zboru, da mašyny pabieh chłopiec, machajučy rukami, kab pryciahnuć uvahu. A ŭ hety čas niepadaloku ŭ kustach siadzieŭ vartavy, pierad jakim paŭstała takaja karcina: ad miesca zboru adjaždžaje mašyna, a za joj niechta honicca, razmachvajučy rukami. Vartavy adrazu pa mabilniku źviazaŭsia z haściami, jakija ŭžo byli na padychodzie: nia jedźcie, tut zasada. U chutkim časie razabralisia.
U čakańni schodu ludzi razmaŭlali, abmiarkoŭvali svajo žyćcio, pryhadvali padziei hieraičnaj minuŭščyny Słuččyny ad Słuckaha zbrojnaha čynu da spaleńnia sudu za savieckim časam. Ludzi, abmiarkoŭvajučy palityčnaje stanovišča, čakajučy pačatku, staralisia razmaŭlać mienavita pa-biełarusku, navat kali ŭ štodzionnym žyćci biełaruskim słovam nie karystalisia. Tamu trochi prykra, što schod vioŭsia pa-rasiejsku. Raznastajnaść u pavalnuju rusifikacyju ŭnieśli vystupy Labiedźki dy Viačorki, jakija svaje pramovy pračytali na cudoŭnaj biełaruskaj movie. Pryčym pieršy vystupaŭ Labiedźka.
Nia ŭsie, chto prysutničaŭ, navažylisia zarehistravacca. U dušach ludziej panuje strach. Z sumam uspaminalisia časy, kali BNF u Słucku naličvaŭ bolš za 100 čałaviek. U hałasavańni ŭziało ŭdzieł 47 čałaviek.
Vybrali pradstaŭnikoŭ na kanhres: adzin ad KCHP-BNF, druhi — pradprymalnik ź vielmi aktyŭnaj žyćciovaj pazicyjaj. Ale, jak zaŭvažyu adzin z udzielnikaŭ schodu, «adna sprava pryjści na schod, a zusim inšaja — chadzić pa kvaterach i źbirać podpisy za adzinaha dy vieści ahitacyju».
Kamientary