Z usioj krainy

Madlen vybiraje svabodu

Miesiac tamu ŭ Navapołacku ź pierasoŭnaha zaacyrku źbiehła zialonaja martyška Madlen. Zavabić nazad u kletku ŭciakačku nia zdoleli. Cyrk źjechaŭ, martyška zastałasia ŭ haradzkim parku. Łovy małpy praciahvajucca da siońnia. Siarod novapałačan znajšlisia ludzi, jakija štodnia padkormlivajuć źbiehłuju «artystku» — tamu nia hoład hałoŭnaja prablema «nielehałki», a choład. Za svaju ŭpartaść Madlen moža papłacicca žyćciom, bo nočy robiacca ŭsio chaładniejšymi. 23 vieraśnia martyšku sprabavaŭ «źniać» snajper z dapamohaj snatvornaj kuli. Adnak jak ni zavablivali martyšku bananami dy bułkami, jana nie nabliziłasia da snajpera na adlehłaść strełu.

Vasil Krokva, Navapołacak

Praniesła

21 vieraśnia ŭ Voršy znajšli hranatu F-1. Maleńki chłopčyk pajšoŭ pa patrebie ŭ kustoŭje, dzie ŭbačyŭ viadomy pa kinafilmach niebiaśpiečny pradmiet. Pra heta jon raskazaŭ svajmu dziadulu, a toj patelefanavaŭ u milicyju. Hetym razam jana dziejničała prafesijna. Tak, pazaletaś u Domie bytu taksama była znojdziena hranata. Milicyjant, jaki vynosiŭ jaje z budynku, zahinuŭ, čaćviora jahonych kalehaŭ byli paranienyja. Ciapier dla abiasškodžvańnia hranaty była vyklikana hrupa raźminavańnia ź Viciebsku. Ale jaje pasłuhi skarystać nie daviałosia: samarobny ŭzryvalnik nie spracavaŭ. Chto ž padkinuŭ hranatu ŭ kustoŭje pobač ź ludnym prypynkam, vyśviatlaje śledztva. Darečy, taho złamyśnika, jaki prynios bajavuju hranatu ŭ Dom bytu, tak i nie znajšli. Śpisali na kryminalnyja razborki.

Nie paśpieli minery dajechać da abłasnoha centru, jak znoŭ telefanujuć z Voršy. Pad adnym z mastoŭ cieraz Dniapro ŭ centry horadu supracoŭniki vyratavalnaj stancyi zaŭvažyli na dnie niejki bojeprypas. Jak vyśvietliłasia, sapraŭdny. 152-milimetrovy artyleryjski snarad časoŭ Druhoj suśvietnaj byŭ uzarvany za horadam.

Daŭhabud na starych padmurkach

U Voršy, na vulicy Savieckaj, aśviačonaja novaja carkva Rastva Baharodzicy. Pieršaje nabaženstva pravioŭ u joj archijapiskap Viciebski i Aršanski Dzimitry. Kab hodna sustreć uładyku, miascovym śviataram daviałosia ŭ aŭralnym režymie ładzić časovyja celafanavyja dach, dźviery, vokny, bo stałych pakul niama. Budujecca chram marudna. Pieršy jaho kamień mitrapalit Fiłaret zakłaŭ jašče ŭ 1998 h. Asablivaść chramu ŭ tym, što jon budujecca na miescy carkvy XVII st., razburanaj savietami. Jaje padmurki zastalisia pad novym chramam. Budavać novuju carkvu na ich — technična niemetazhodna.

Jaŭhien Žarnasiek, Vorša

Chakiej u krepaści

Narešcie vyśvietliłasia, dzie ŭ Babrujsku budzie pabudavany Ladovy pałac. Spartovaja arena raźmieścicca na terytoryi histaryčnaha pomnika «Babrujskaja krepaść» i zmoža ŭmiaščać ažno vosiem tysiač hledačoŭ. Miarkujecca, što adnačasova z budaŭnictvam pałacu rekanstrujujuć i histaryčny pomnik.

Nadzieja Lisoŭskaja, Babrujsk

• 0
• 0
• 0
• 0
• 0
• 0
• 0
• 0