Chronika

Aktyvista Sajuzu palakaŭ Biełarusi žurnalista Andreja Pačobuta milicyjanty zatrymali ŭ Horadni 20 kastryčnika i ŭručyli jamu dakument z padpiskaj ab niavyjeździe z pryčyny nia vypłačanaha da kanca štrafu za ŭdzieł u niesankcyjanavanym pikiecie. Žurnalist nia staŭ jaho padpisvać, zajaviŭšy pra svaju niazhodu z takoj mieraj strymańnia. Štraf składaje 5,1 młn rub. Žurnalistu ŭdałosia naźbirać 4,6 młn. Reštu jon pakul nie spłaciŭ.

Babrujskija hierojstvy

18 kastryčnika ŭ Babrujsku dvoje nieviadomych sprabavali siłaj zaciahnuć u mašynu kiraŭnika miascovaj filii AHP Uładzimiera Kurtukova. Vyratavali znajomyja, jakija byli niepadalok.

Na rok-kancercie ŭ Babrujsku 22 kastryčnika zatrymany maładafrontaŭcy Dzianis Bujnicki j Siaržuk Łacinski, jakija ŭźniali bieł-čyrvona-bieły ściah. Na ich skłali pratakoł za «chulihanstva». Čatyroch maładafrontaŭcaŭ, jakija zładzili pikiet u padtrymku zatrymanych kala milicyi, zaviali ŭ pastarunak, ale adpuścili praz try hadziny biez składańnia pratakołaŭ.

Śledčym niama čaho rabić

Śledčyja prychodzili 20 kastryčnika «na razmovu» da aktyvista niezarehistravanaha «Maładoha frontu» Sieržuka Marčyka dy jahonaha adnahrupnika Andrusia Jurucia — studentaŭ Baranavickaha ŭniversytetu. Ich cikavili maładafrontaŭskija ŭlotki, raźviešanyja ŭ Baranavičach.

U Kobryni baptystaŭ mučać

20 kastryčnika ŭ Kobryni pradstaŭniki rajvykankamu, pažarnaj inspekcyi j sanstancyi skłali pratakoły na pastaraŭ niezarehistravanych supołak cerkvaŭ Chryścijanaŭ viery evanhielskaj Mikałaja Radkoviča j Evanhielskich chryścijanaŭ-baptystaŭ Ściapana Kanavalčuka. Radkoviča za parušeńnie praviłaŭ pažarnaj biaśpieki aštrafavali na 25 tys.rub.

Sarvany moładzievy forum

Try mikraaŭtobusy z delehatami moładzievaha forumu, jakija jechali ŭ Horadniu, zatrymali 21 kastryčnika pad Vałožynam. Milicyjanty śpiarša šukali vybuchovyja rečyvy, potym zajavili, što aŭtobusy pierahružanyja. Tym časam na turbazu pad Horadniaj prybyli amapaŭcy i supracoŭniki KDB ź videakamerami.

Doktarka zmahajecca za praŭdu

Žytkavicki rajonny sud 21 kastryčnika adchiliŭ pazoŭ hałoŭnaj lekarki Turaŭskaha špitalu Iryny Siarhiejčyk da administracyi rajonnaha medabjadnańnia. Jaje zvolnili, zajaviŭšy, što dośvied i viedy nie adpaviadajuć zajmanaj pasadzie, adnak papiaredni sud adnaviŭ lekarku na pracy. Tym časam I.Siarhiejčyk stvaryła pry špitali reabilitacyjny centar.

Haradzienskija štrafy

Sud Kastryčnickaha rajonu 13 kastryčnika abaviazaŭ TDA «Albatros» vypłacić čalcu prafsajuzu REP Viačasłavu Ściaškieviču 1 274 770 rub.: jon zvolniŭsia z pradpryjemstva, adnak pry zvalnieńni ź im nie praviali poŭny raźlik.

U Bieraści nalot na Šymanskaha

Bieraściejskaja filija HA «Fond imia Lava Sapiehi» 18 kastryčnika vykanała patrabavańnie Minjustu j źmianiła status, admoviŭšysia ad prava jurydyčnaj asoby.

Kiraŭnik Bieraściejskaha fondu padtrymki moładzievych inicyjatyŭ «Dziedzič» Źmicier Šymanski 20 kastryčnika padaŭ skarhu ŭ prakuraturu na dziejańni milicyjantaŭ. Za tydzień da taho jany ŭvarvalisia ŭ pamiaškańnie arhanizacyi, spacłaŭšysia na infarmacyju, što tam «adbyvajecca bojka», i kanfiskavali drukavanyja vydańni.

Levanieŭski ŭ Miensku

Palitviaźnia Valerja Levanieŭskaha vieźli ź Ivacevič u mienskuju bolnicu try dni — z 15 pa 18 kastryčnika. Jon taksama padaŭ zajavu ŭ Ivacevicki rajonny sud z patrabavańniem spahnać z papraŭčaj kalonii №22 481 tys.rub.: Levanieŭski ličyć, što administracyja nie dapłaciła jamu za pracu.

Minjust pracuje

PBNF atrymała list ad načalnika ŭpraŭleńnia hramadzkich abjadnańniaŭ Ministerstva justycyi Aleha Śližeŭskaha: čynoŭnik patrabuje padać śpis vyłučanych na Kanhres demsiłaŭ delehataŭ ad niezarehistravanych arhanizacyj «Perspektyva» j «Pravy aljans».

Ministerstva 20 kastryčnika skončyła pravierku niedziaržaŭnych prafsajuzaŭ. Svabodnamu prafsajuzu metalistaŭ prapanavana źmianić status, bo jon nia maje nieabchodnaj kolkaści čalcoŭ. Materyjały na Demakratyčny prafsajuz transpartnikaŭ nakiravanyja ŭ prakuraturu.

BKDP i «Dień» suprać Mienharvykankamu

Saviet Biełaruskaha kanhresu demakratyčnych prafsajuzaŭ 20 kastryčnika padaŭ u sud i prakuraturu pazoŭ na Mienharvykankam za parušeńnie Kanstytucyi j zakonu. Padstavaj stałsia toje, što haradzkija ŭłady dazvolili BKDP pikiet na płoščy Banhałor u padtrymku niezaležnych prafsajuzaŭ, abaviazaŭšy padpisać damovu z šaściu subjektami (u tym liku chutkaj dapamohaj, milicyjaj i h.d.) na akazańnie pasłuh. Kvitancyi pra apłatu treba było prynieści da pačatku akcyi.

TDA «Dzieńpres» — vydaviec hazety «Dień» — padało ŭ sud na Mienharvykankam: čynoŭniki likvidavali tavarystva za «nieažyćciaŭleńnie haspadarčaj dziejnaści». Praces pieraniesieny na 28 kastryčnika.

Zatrymali za «Narodnuju volu»

Barysa Chamajdu viciebskija milicyjanty zatrymali 21 kastryčnika padčas raspaŭsiudu «Narodnaj voli». U pastarunku ŭ jaho pierahledzieli ŭsie vydańni: «BDH. Diełovuju hazietu» i časopis «Arche» viarnuli, niezarehistravanuju hazetu «Vybar» kanfiskavali.

Fond Sapiehi vysialajuć

Viciebskuju filiju fondu imia Lava Sapiehi sprabujuć vysielić: pry kancy kastryčnika arhanizacyja atrymała čarhovaje patrabavańnie ad ŽRET Pieršamajskaha rajonu pakinuć pamiaškańnie, dzie jana maje «prapisku». Płoščy majuć vykarystoŭvacca «pa inšym pryznačeńni». Arhanizacyju sprabujuć vysielić z kanca žniŭnia.

Sprava Čarkasavaj

Termin papiaredniaha raśśledavańnia zabojstva žurnalistki Vieraniki Čarkasavaj padoŭžany jašče na dva miesiacy.

Zatrymańni ŭ Mazyry

U Mazyry 22 kastryčnika milicyjanty zatrymali ŭ pryvatnym domie aktyvistaŭ maładziovaj filii AHP, niezarehistravanaha maładziovaha centru «Hart», jakija sustrakalisia z hramadziankaj Francyi Safi Vaźniak i hramadzianinam Polščy Michałam Papinam. Zamiežnych hramadzianaŭ milicyjanty nia vypuścili, a pavieźli praź Miensk — departavać u Polšču, choć dakumenty ŭ ich byli ŭ paradku.

AŠ

• 0
• 0
• 0
• 0
• 0
• 0
• 0
• 0