«Nierazumieńnie taho, što nie jon, a Śviatłana ciapier centralnaja fihura. Na škodu hramadskim intaresam»

Ja pračytała tłumačeńnie Siarhieja Cichanoŭskaha. Byccam by, pačynaje jon pravilna: kaža, što stavicca da Śviatłany pavažliva i pryznaje svaju hrubaść. Ale z treciaha punkta — sucelnyja apraŭdańni i pierakładańnie adkaznaści za svaje pavodziny na inšych, nierazumieńnie taho, što nie jon, a Śviatłana ciapier centralnaja fihura. Heta pieraciahvańnie ŭvahi na siabie na škodu hramadskim intaresam.

Jak žančyna i hiendarnaja daśledčyca ja ŭbačyła ŭ tym, što zdaryłasia, vielmi šmat roznych płastoŭ. Pierš za ŭsio, heta było padobna na toje, što muž čytaje žoncy lekcyju. Pryčym publična — u prysutnaści dyjaspary, supracoŭnikaŭ i supracoŭnic kamandy Śviatłany, nieznajomych dla jaje biełarusaŭ i biełarusak.

Toje, što adbyvałasia, nie prosta trapiła ŭ strym — jon jak byccam apielavaŭ da prysutnych ludziej. Heta nie zvyčajnaja siamiejnaja razborka, a mienavita publičnaje dziejańnie. I, viadoma, jano vyklikała vielmi niehatyŭnyja ŭražańni.

Toje, što zdaryłasia, było, pa sutnaści, prynižeńniem dla Śviatłany jak dla lidarki, jak dla čałavieka i jak dla žančyny. Takija pavodziny muža na ludziach vyhladajuć vielmi niepryhoža. Heta manipulacyja, psichałahičny i vierbalny hvałt. Jak ni nazavi, situacyja vielmi niepryjemnaja.

Siarhiej pa abjektyŭnych pryčynach, viadoma, vypaŭ z paradku dnia. Jon nie prajšoŭ toj šlach, jaki prajšła Śviatłana. Zastaŭsia čałaviekam prykładna takim ža, jakim byŭ da 2020‑ha i ŭ 2020-m. U jaho sfarmavaŭsia tunelny zrok, čorna-bieły śviet. Siarhiej nie bačyć usioj składanaści i raznastajnaści ciapierašniaha paradku dnia, sučasnych padychodaŭ.

Jon nie razumieje, što dla Śviatłany jak dla nacyjanalnaj lidarki jość nie adzin stejkchołdar, a niekalki. I treba niejkim čynam bałansavać, sumiaščać intaresy roznych struktur, subjektaŭ i instytutaŭ. A dla Siarhieja jość tolki «našy» i «vorahi».

Heta sihnał nam usim, što ź ludźmi, jakija vyjšli z turmaŭ, treba pracavać. Pavinny pracavać psichołahi, daradcy — i palityčnyja, i kamunikacyjnyja.

Kali Siarhiej, naprykład, paraŭnoŭvaŭ kanały CNN i Fox News, było vidać, što jon niedastatkova palityčna padkavany. Ale razumieńnie taho, što Tramp prychodzić i sychodzić, a Złučanyja Štaty zastajucca, i ŭśviedamleńnie roli CNN jak adnaho z najbujniejšych infarmacyjnych kanałaŭ z reputacyjaj i žurnalisckimi standartami — heta rečy, jakija treba tłumačyć i Cichanoŭskamu, i inšym ludziam, jakija buduć vykazvać svajo mierkavańnie.

Śviatłana ž za hetyja hady vielmi vyrasła. U hetym sensie jana typovaja biełaruska, jakaja pracuje nad saboj, pierahladaje mnohija rečy i raźvivajecca. I jana, jak mnie zdajecca, paviała siabie maksimalna hodna — zachavała i svoj, i jahony tvar. Śviatłana nie stała zajaŭlać, što «ty kažaš hłupstva, nie pieraškadžaj mnie» i hetak dalej. Jana była maksimalna bieražlivaj da Siarhieja. Jaje vytrymka i spakoj zasłuhoŭvajuć vialikaj pavahi i, moža być, navat zachapleńnia. A što, było b lepš, kali b jany pasvarylisia na vačach va ŭsich? Heta było b u tysiaču razoŭ horš.

Zrešty, tut my pierachodzim da prablemy nie tolki siamji Cichanoŭskich, ale i, napeŭna, biełaruskaha hramadstva ŭ cełym.

Vielmi typovaja madel: mužčyna ličyć siabie hałoŭnym i maje prava pakazvać, što maje rabić žančyna, navat kali jana ŭ niejkim sensie vyšejšaja jaho pa statusie. Jon usio adno ŭpeŭnieny, što apošniaje słova za im. Vielmi typovy prykład pavodzin.

Jašče adzin važny momant, jaki tyčycca siamji. Pahladzicie, kolki ich razburyŭ režym, jaki na słovach vystupaje za tradycyjnyja kaštoŭnaści. Kali ludziej sadžajuć u turmy — heta vialikaje vyprabavańnie. Padumajcie, jakoje žyćcio było ŭ Śviatłany hetyja piać hadoŭ, i jakoje — u Siarhieja. Jany pražyli hetyja hady byccam na roznych płanietach. I jak važna, kab ich adnosiny, pavaha i luboŭ adzin da adnaho zachavalisia.

Mnie b nie chaciełasia, kab my ciapier rabili z hetaha niejkuju pakazalnuju karcinu i kazali, što tak rabić nielha i što Śviatłana pavinna pryniać niejkaje rašeńnie. Jany — siamja. I my bačym pa nievierbalnych sihnałach, što jany lubiać i pavažajuć adzin adnaho. Tut, ja dumaju, pavinna być praca, mahčyma, piersanalnaja ź imi jak z paraj, kab dapamahčy im zrazumieć novych adzin adnaho, zrazumieć toje, što źmianiłasia.

Važna razumieć, čamu Śviatłana i Siarhiej tak papularnyja ŭ častki biełaruskaha hramadstva. Tamu što jany typovyja biełarusy. Mienavita takija, jak bolšaść. I toje, jak jany pavodziać siabie, — prykład dla nas dla ŭsich.

Čamu pavodziny Siarhieja vyklikali takuju niehatyŭnuju reakcyju? Nie tolki tamu, što jon havaryŭ nieprymalnyja rečy z punktu hledžańnia palitałohii i mižnarodnych adnosin. Ale i tamu, što jon niepryhoža pavodziŭ siabie sa svajoj žonkaj.

I heta sihnał: kali tak možna pavodzić siabie sa Śviatłanaj, nacyjanalnaj lidarkaj i čałaviekam, jaki karystajecca vialikaj pavahaj, to jak tady možna pavodzić siabie ŭ adnosinach da zvyčajnaj biełaruskaj žančyny?

Jašče adna reč zdajecca važnaj. Źviarnicie ŭvahu, Siarhiej skazaŭ: «Vyzvalać našych chłopcaŭ». Heta značyć, pa jaho ŭjaŭleńni, siadziać tolki mužčyny? Heta nie tak. Siadzić dastatkovaja kolkaść žančyn, u tym liku z hihanckimi terminami — Maryna Zołatava, Maryja Kaleśnikava, Marfa Rabkova i inšyja. Tak što hiendarnaja pryzma tut taksama vielmi dobra pracuje.

Śviatłana i Siarhiej dla prademakratyčnaj častki biełaruskaha hramadstva — «siamja numar adzin» i rolevaja madel. Ich pavodziny nie tolki ŭ rolach palityčnaj lidarki i demakratyčnaha aktyvista, ale jak zvyčajnych muža i žonki — važnyja sihnały dla nas usich.

I Siarhiej pavinien pakazvać prykład pavažlivych, empatyčnych i padtrymlivajučych pavodzin u dačynieńni da Śviatłany, a nie manipulatyŭnych i abjuziŭnych.

Kali jon płakaŭ adrazu paśla vyzvaleńnia, kažučy pra toje, što dačka jaho nie paznała, heta było ŭ šmat razoŭ bolš mužnym i sučasnym, čym publičny cisk na žonku.

Pieršy džentlmien — prykład dla ŭsich astatnich. Chaj heta budzie hodny prykład.

• 23
• 5
• 0
• 5
• 1
• 0
• 0
• 0