Kitajskija internet-cenzary, viadomyja svajoj strohaj baraćboj z palityčnym inšadumstvam i krytykaj ułady, znajšli novaha voraha — niehatyŭnyja nastroi. Internet-rehulatar krainy abviaściŭ dvuchmiesiačnuju ahulnanacyjanalnuju kampaniju, nakiravanuju na vykaranieńnie piesimizmu ŭ sacyjalnych sietkach i na videapłatformach.
Pavodle zajavy Administracyi kibierprastory Kitaja, jak paviedamlaje CNN, niekatory kantent «złamysna skažaje sacyjalnyja źjavy, vybaračna pierabolšvaje niehatyŭnyja vypadki i vykarystoŭvaje ich dla prasoŭvańnia nihilistyčnych ci inšych niehatyŭnych śvietapohladaŭ».
Inšyja dopisy, jak adznačajecca, «praźmierna prasiaknutyja samaprynižeńniem abo ŭzmacniajuć pačućcio rospačy, što padšturchoŭvaje inšych da pierajmańnia».
Hetaja kampanija stała adkazam na rost piesimizmu ŭ hramadstvie, vyklikanaha šmathadovymi ekanamičnymi prablemami: kryzisam na rynku nieruchomaści, padzieńniem spažyvieckaha davieru i vysokim uzroŭniem biespracoŭja, asabliva siarod moładzi.
Mienavita ŭ takich umovach siarod maładych kitajcaŭ u 2021 hodzie nabyła papularnaść fiłasofija «tan-pin» (litaralna «lažać płastom») — admova ad karjernych ambicyj na karyść prostaha žyćcia biez stresu.
Novaj kampanii papiaredničali błakavańnie akaŭntaŭ błohieraŭ, jakija raskazvali pra taki ład žyćcia. Akramia taho, internet-rehulatar niadaŭna pakaraŭ takija płatformy, jak Weibo, padobny da TikTok Kuaishou i Xiaohongshu (kitajski anałah Instagram), za niedastatkovuju maderacyju «škodnaj» infarmacyi, takoj, jak «raspalvańnie ažyjatažu vakoł asabistych navin znakamitaściaŭ i drobiaznych pytańniaŭ».
U zajavie, raspaŭsiudžanaj 22 vieraśnia, internet-rehulatar paviedamiŭ, što kampanija taksama achoplivaje kantent, jaki «raspalvaje krajniuju kanfrantacyju pamiž hrupami», «raspaŭsiudžvaje strach i tryvohu» i «padsiłkoŭvaje hvałt i varožaść u internecie».
Dziaržaŭnyja ŚMI ŭžo nazvali kampaniju «svoječasovym» adkazam na «panujučy chaos».
Dža Jan Čonh, prafiesar palitałohii z Nacyjanalnaha ŭniviersiteta Sinhapura, miarkuje, što takim čynam ułady sprabujuć kiravać hramadskimi nastrojami, kab stymulavać spažyvańnie i padtrymać ekanamičny rost. Adnak jon sumniavajecca, što zabarony źmieniać realnyja pačućci ludziej biez palapšeńnia ich žyćciovych i karjernych pierśpiektyŭ.
Ekśpiert upeŭnieny, što karystalniki, jak i raniej, znojduć novyja sposaby vykazvać svaje dumki.
Kamientary
Etoho nie ponimajut i staryje pierduny Rośsii i Biełarusi.