«U nas intervju CNN nie pad ženščynu». Jak biełarusy kamientujuć u sacsietkach kanflikt Cichanoŭskich
24 vieraśnia na sustrečy ź biełarusami ŭ Ńju-Jorku Siarhiej Cichanoŭski zapatrabavaŭ, kab prysutnaja tam Śviatłana Cichanoŭskaja admoviłasia ad zapłanavanaha intervju dla CNN i zastałasia ź imi. U sacsietkach horača abmiarkoŭvajuć hety kanflikt i tłumačeńni Siarhieja paśla.
Mikałaj Chalezin, režysior i suzasnavalnik Svabodnaha teatra, pracytavaŭ u fejsbuku słovy Cichanoŭskaha padčas toj sprečki i adznačyŭ, što historyja vyklikała ŭ jaho soram:
«Druhi prykład, kali chočacca schavać vočy ad uražalnaha palityčnaha analizu: «Heta ž nie Fox News. Fox News — voś heta kanał, jaki hladzić Donald Tramp, i jamu budzie pryjemna ŭbačyć Śviatłanu Hieorhijeŭnu na Fox News i vyzvalić našych chłopcaŭ».
Nakolki ja razumieju, mienavita taki ŭzrovień palityčnaha analizu ciapier budzie daminavać u Ofisie».
Padobnymi adčuvańniami dzielicca kiraŭnik «Bajchiełpa» Alaksiej Lavončyk:
«Dva razy pierahledzieŭ i zastaŭsia pry pieršym uražańni. Iści na CNN ci nie iści — heta była nia sprečka. Heta było sproba Siarhieja publična pastavić žonku na miesca i pakazać, chto tut hałoŭny (ci ličyć siabie hałoŭnym).
A pasaž pra Fox News byŭ absalutna bazarnym. «Tramp pabačyć ciabie na svaim lubimym kanale i vyzvalić našych chłopcaŭ». Like, what?
Hišpański soram».
Kirył Atamančyk, pradprymalnik i aktyvist biełaruskaj dyjaspary ŭ Vilni, ličyć, što pavodziny Cichanoŭskaha mohuć być škodnyja dla demsiłaŭ. Tamu, piša Atamančyk, varta terminova vypraŭlać situacyju:
«Ja prosta zhadaju słovy samaho Cichanoŭskaha, jakija prahučali adrazu paśla jaho vychadu z turmy, što, maŭlaŭ, «Łukašenka jaho vychadam budzie namahacca ŭbić klin i ŭnutrany razład u apazicyi». I tady jon sam dadaŭ: «Nie dačakajeciesia». I kali jaho pierły pieršaha miesiaca možna śpisać na toje, što čałaviek traŭmavany i pa-za kantekstam, to jaho pierły zaraz možna śpisać vyklučna na jaho charaktar.
Raźlik biełaruskich śpiecsłužbaŭ vielmi dakładny. Jany cudoŭna viedajuć psichałahičny partret jak Siarhieja, tak i Śviatłany. I z hetym terminova treba niešta rabić. U pieršuju čarhu, lidarstva tut musić być za Śviatłanaj. Heta žorstkija rašeńni, ale Siaroha prosta nie razumieje svajo miesca i nie bačyć toje, što jon robić. Na žal, heta daviadziecca tłumačyć jamu, bo vyhladaje ŭsio tak, što razład budzie. Siarhiej nie pieraros uzrovień błohiera. I, vidać, nie pieraraście».
Historyk Alaksandr Paškievič kaža, što varta adździalać hramadska-palityčnuju dziejnaść Śviatłany ad dziejnaści Siarhieja — kab takija situacyi bolš nie paŭtaralisia:
«Jak adabjecca na siamiejnych stasunkach Śviatłany i Siarhieja niadaŭni epizod u Ńju-Jorku — sprava zusim nie naša, ale ŭ hramadska-palityčnym sensie, pa-mojmu, heta musić mieć kankretny vynik — pryniaćcie pryncypovaha rašeńnia ab admovie ad praviadzieńnia padobnych sumiesnych strymaŭ.
Tym bolš što z času vychadu Cichanoŭskaha z turmy akurat prajšło amal 100 dzion, jakija zvyčajna dajucca palitykam na toje, kab prajavić siabie i pakazać, u jakim kirunku jany iduć. U vypadku vyzvalenych palitviaźniaŭ, nastrojenych na praciah aktyŭnaj dziejnaści — heta čas pakazać, jak jany buduć rasparadžacca nabytym maralnym aŭtarytetam. Cichanoŭski pakazaŭ, i iluzij adnosna mahčymaści jahonaj evalucyi bolš nie zastajecca.
Zabaranić jamu rabić toje, što sam ličyć patrebnym, nichto nie moža, jon maje na heta prava. Ale treba nadalej vyrazna raździalić hramadska-palityčnyja treki Śviatłany i Siarhieja. Takija situacyi bolš nie pavinny paŭtaracca».
Eks-śpikier Kaardynacyjnaj rady Andrej Jahoraŭ, jaki zvyčajna krytykuje Cichanoŭskuju i jaje kamandu, vykazaŭ padtrymku joj:
«Ja šmat dzie nie pahadžajusia z tym, što robić Śviatłana Cichanoŭskaja. Nieadnarazova i publična, i ŭ niepubličnych situacyjach krytykavaŭ i spračaŭsia i ź joj piersanalna, i ź siabrami jaje kamandy.
Ale ž takich adnosinaŭ, jak siońnia demanstravaŭ da jaje Siarhiej Cichanoŭski, jana nijak nie zasłuhoŭvaje. Ni jak lidar, ni jak čałaviek, ni jak žančyna.
Publičnyja vybačeńni — heta minimum, što tut treba zrabić».
Viadučy «Obyčnoho utra» Kanstancin Kavieryn nazvaŭ situacyju «publičnym abjuzam».
«Tak nielha. Ni z kim i nikoli. Mnie nadzvyčaj škada, što tak vyjšła.
Pry hetym u mianie nie pavierniecca jazyk skazać niejkuju hadaść u adras Cichanoŭskaha. Jon — voś taki. Inšaha Cichanoŭskaha ŭ Biełarusi niama. Unikalny. Naprałom. Hetym i razbudziŭ krainu ŭ 20-m. Mnie ciažka vystaŭlać pretenzii chirurhu za toje, što niejak zašmat kryvi było padčas apieracyi.
Ja lepš stojačy paapładziruju vytrymcy Śviatłany. Vidać, jak joj było ciažka, i jak ža kruta jana siabie paviała!
Ščyra kažučy, ja byŭ by nie suprać, kali b jana i na samaj spravie była b prezidentkaj majoj krainy. Heta značyć, nie «da novych vybaraŭ», jak heta zajaŭlałasia pieršapačatkova, a na ŭvieś adviedzieny zakonam termin», — napisaŭ Kavieryn.
Abmiarkoŭvajuć sprečku i ŭ sacsietcy Ch (tvitar). Błohier Džypsinkoŭ namiakaje na toje, što pavodziny Cichanoŭskaha nahadvajuć jamu Łukašenku. Jaho žart — adsyłka da słoŭ Łukašenki pra toje, što biełaruskaja Kanstytucyja stvoranaja «nie pad žančynu»:
«U nas intervju CNN nie pad ženščynu».
Analityk Arciom Šrajbman zapościŭ skryn z tekstam, dzie Cichanoŭski tłumačyć svaje pavodziny, razam sa zdymkam kiraŭnika KDB Ivana Cierciela:
Žurnalistka Julija Matuzava zaŭvažaje, što pavodziny Siarhieja adroźnivajucca ad jaho abiacańniaŭ paśla vyzvaleńnia:
«Pamiataju, što Siarhiej Cichanoŭski, jak tolki vyjšaŭ, paabiacaŭ, što nijak nie budzie ŭmiešvacca ŭ pracu Śviatłany. Niepryjemna bačyć, jak hanarlivaść i ŭłasnyja ambicyi ŭsio ž pieramahajuć, i na prezidentku cisnuć navat u žyvym efiry».
«Naša Niva» — bastyjon biełaruščyny
PADTRYMAĆCiapier čytajuć
Cichanoŭski patłumačyŭ, čamu jon tak pavodziŭ siabie ŭ Ńju-Jorku78
Kamientary