Na raźvićcio chakieja Biełaruś tracić bolš, čym na raźvićcio vyšejšaj adukacyi ci demahrafičnuju biaśpieku

Na dziaržprahramu raźvićcia chakieja (2011–2014 hady) płanujecca vydatkavać kala 259 młrd. rubloŭ. Heta hrošy na padrychtoŭku trenieraŭ, prapahandu, arhanizacyju spabornictvaŭ i inšaje. Pabudova ladovych pałacaŭ i sponsarstva ad dziaržpradpryjemstvaŭ tut nie ŭličvajucca.

Paraŭnajem chakiejnuju dziaržprahramu ź inšymi. Na raźvićcio vyšejšaj adukacyi (2011–2015 hady) płanujuć vydatkavać prykładna 230 młrd rubloŭ (vyjšła tańniej, čym chakiej).

12-hadovaja dziaržprahrama padrychtoŭki kadraŭ dla jadziernaj enierhietyki (budujem ža atamnuju elektrastancyju!) kaštuje kala 54 młrd rubloŭ ― amal u piać razoŭ mienš, čym chakiej.

Navat nacyjanalnaja prahrama demahrafičnaj biaśpieki (na 2011–2015 hady) akazałasia značna mienš aktualnaj za chakiej ― kala 186 młrd rubloŭ.

Tym časam naša zbornaja pa chakiei treci hod zapar demanstruje žaleznuju «stabilnaść» na čempijanatach śvietu ― 14-je miesca. Hulajuć na miažy vyletu z elity.

«Čamu nie lepšaje vynik? Moža, hrošaj mała vydatkoŭvajecca?» ― pytajemsia va Uładzimira Krykunova, samaha paśpiachovaha treniera zbornaj Biełarusi ŭ historyi. Siońnia śpiecyjalist treniruje rasijski «Naftachimik» ― kłub KCHŁ.

«Dy nie ŭ hetym sprava. Vy ž stvaryli kamandu dla KCHŁ, «Dynama-Minsk». I atrymlivajecca, što vy jaje stvaryli dla finaŭ, amierykancaŭ, kanadcaŭ, čechaŭ i słavakaŭ, ― pieraličvaje śpiecyjalist. ― Svaich ža hulcoŭ tam mała. Treba było zrabić tak, jak kazachi. Jany ciapier usich svaich padciahvajuć u kamandu, jakaja hulaje ŭ KCHŁ («Barys» z Astany). Tam było 12 lehijanieraŭ. Potym ich stała piać, u vyniku zastalisia troje. Lehijanieraŭ zamianili svaimi. I ničoha, svaje na tym ža ŭzroŭni zahulali. Dali im šanc, i hulcy stali viadučymi ŭ kamandzie. Voś i vy pavinny ŭ «Dynama» pakinuć piać lehijanieraŭ ― adno źviano ― i try piaciorki svaich hulcoŭ. I vašy chłopcy vielmi chutka vyrastuć, asabliva maładyja. Litaralna za 4–5 miesiacaŭ vyjduć na ŭzrovień KCHŁ i budzie im lohka tam hulać».

Niedaskanałaści, na jakija ŭkazvaje Uładzimir Krykunoŭ majuć bolš taktyčny charaktar. Śpiecyjalist razvažaje, čamu chakieistam zbornaj Biełarusi nie ŭdałosia prajści praz čempijanat śvietu z vysoka padniataj hałavoj:

«Dyk skład małady byŭ, adkul pryjšli ŭ zbornuju hetyja chłopcy? Treba było im hulać u KCHŁ. Jany ciapier maładyja, im treba troški dapamahčy, i jany tady chutka-chutka vyrastuć.

Ahulny ŭzrovień chakieja padros. Da taho ž raniej biełaruskija zborniki hulali ŭ NCHŁ i ŭ rasijskim čempijanacie. Byli na viadučych pazicyjach. Ich źbirali, jany šmat pracavali. Siońnia ž mnohija dumajuć pra toje, jak mienš pracavać i bolš zarablać. A tady bolš dumali pra pracu. U biełaruskich zbornikaŭ była dobraja škoła. Usie žadali hulać za zbornuju.

Raniej u kamandach nie byvała takoha, kab 15 čałaviek uklučali adnym macham u kamandu. Mahli syści troje, i troje ich zamianiali. Byŭ tryvały skład, hulali stabilna. Pracavali 11 miesiacaŭ na hod i tolki miesiac adpačyvali. U kamandu pryciahvali maładych. Jany, hulajučy z daśviedčanymi, padciahvalisia. A ciapier hetym nie zajmajucca. Ciapier tak: pačuli, što ŭ Amierycy jość mocny hulec. Voś kupim jaho. Tam jość chakieist ― kupim. I tak kupim, kupim, kupim. A ŭ Biełarusi, u Rasii, u Kazachstanie jość talenavityja ludzi, i ich treba padciahvać».

• 0
• 0
• 0
• 0
• 0
• 0
• 0
• 0