Baćki biaruć kredyt pad 34%, kab lačyć syna ŭ Kitai. U Biełarusi admovili
U dvuchhadovaha Dzimy — epileptyčny sindrom. Chvarobu chłopčyk atrymaŭ padčas rodaŭ, ale zaraz miedyki kažuć, što ŭ Biełarusi małomu lačeńnia niama.
Dzimie Rahažynskamu ciapier amal dva hady. U dziciaci epileptyčny sindrom, chłopčyk tryvaje strašnyja sutarhi, a ad jaho lačeńnia ŭ Biełarusi admaŭlajucca: kažuć, što dzicia vielmi ciažkaje. Choć da naradžeńnia baćki Dzimy, Jaŭhienija i Mikałaj, i ŭ strašnym śnie nie mahli ŭjavić, što zdarycca biada.
«Dzicia čakali z mužam i vielmi mocna, vielmi radavalisia, kali ja zaciažaryła. Usia ciažarnaść dobra prachodziła, analizy i ŭltrahukavoje daśledavańnie pakazvali, što ź niemaŭlom ŭsio dobra», — raskazvaje maci chłopčyka Ženia.
U radzilni niečakana žančynu pačali stymulavać tabletkami, kab jana chutčej naradziła.
«Ad bolu ja traciła prytomnaść, i mnie ŭkałoli abiazbolvajučaje. Ja pračnułasia ad lamantu — majo dzicia nie dychaje, i kali ja nie naradžu, dzicia zahinie.Ad abiazbolvajučaha ja nie adčuvała schvatak, i miedyki navalilisia na mianie, kab vycisnuć dzicia z žyvata», — Ženia kaža, što nie pačuła, jak kryčyć niemaŭla, ale jaje supakoili: paśpi, ŭsio budzie dobra.
Dobra nie stała ni zaŭtra, ni paśla. Dzicia znoŭ pierastała dychać i niemaŭla pieraviali ŭ reanimacyju, dzie chłopčyku štučna vientylavali lohkija vosiem dzion.
Pieršyja niekalki miesiacaŭ žyćcia Dzima razam z maci nie vyłazili ź miedcentraŭ, dzie dziciaci, jakoje ciarpieła strašnyja sutarhi davali prosty supraćsutaržny preparat.
«Mnie padajecca, daktary prosta bajalisia narabić škody majmu dziciaci. Ad nas admaŭlalisia va ŭsich centrach, kazali, što dzicia vielmi ciažkaje», — miarkuje Ženia.
Nieŭzabavie maleńkamu Dzimie, jaki nie moh hłytać i jeści, prapanavali ŭstavić trubačku ŭ straŭnik i hetak karmić da kanca žyćcia. Dzima schudnieŭ, pastajanna lačyŭsia ad pnieŭmanii i branchitu.Ad adčaju maci chłopčyka amal pahadziłasia na trubačku, ale vypadkova natknułasia na kliniku ŭ Kitai. Sabraŭšy hrošy na lačeńnie, 13 tysiač dołaraŭ za adzin raz, žančyna pajechała ŭ Padniabiesnuju. Žančyna pabyvała tam dvojčy i paśla hetaha Dzima pačaŭ hłytać i jeść sam, hladzieć mulciki i navat sprabavać pieravaročvacca.
«Nas nazirajuć u Biełarusi, robiać zdymki mozhu i kažuć, što adbyŭsia cud. Ale ja dumaju, što heta nie cud, heta vynik terapii ŭ Kitai», — tłumačyć Ženia. Žančyna kaža, što na dva kursy terapii za miažoj zabrali ŭsie hrošy ŭ rodnych i znajomych, i ciapier jana raźličvaje tolki na nieabyjakavych ludziej.
«Nas čakajuć u Kitai ŭ žniŭni, a hrošaj sabrać treba jašče mnoha. Kali nie atrymajecca, budu brać kredyt», — kaža Ženia.
Kredyt na miedpasłuhi ŭ «Biełarusbanku» sapraŭdy dajuć — pad 11,75% hadavych. Ale daduć jaho tolki na lačeńnie… ŭ Biełarusi. Kab lačycca za miažoj, treba brać prosty spažyviecki kredyt pad 34% hadavych na piać hadoŭ — heta samyja maleńkija pracenty.
«Suma vypłaty pieršy miesiac składzie — 4,5 miljona rubloŭ», — kansultujuć u Biełarusbanku.
Ciapier siamja žyvie na zarobak muža Mikałaja, apieratara na zapraŭcy, dapamohu rodnych i svajakoŭ i vypłaty dziaržavy na dzicia.Ženia kaža, što jany sprabujuć sami vučycca mietodykam masažu, kab niejak skaracić vydatki na lačeńnie syna.
«Heta 2 miljony za invalidnaść i dapamoha na dzicia da troch hadoŭ.Ale ja b nie chacieła hetych hrošaj, kali b tolki Dzima byŭ zdarovy. My starajemsia, kab ŭ Dzimy była sadavina, mnoha vydatkoŭvajem na leki, tamu starajemsia siabie abmiažoŭvać», — bačna, što Ženia nie źbirajecca apuskać ruki i hałoŭnaje dla jaje — zdaroŭje syna.
Kantaktnyja telefony siamji Rahažynskich možna pahladzieć na ich sajcie.
Kamientary