12 miedcentraŭ, pazbaŭlenych licenzii — śpis

Hetaja infarmacyja była padadziena na nastupny dzień paśla zapytu karespandenta Svabody.

Jak paviedamiła pres-słužba ministerstva, u suviazi z vyjaŭlenymi hrubymi parušeńniami pry vykanańni rabot i pasłuh pa anestezijalohii i reanimatalohii, chirurhii, hinekalohii, chirurhičnaj stamatalohii, jakija paciahnuli abo mohuć paciahnuć za saboj u hramadzian ustojlivaje rasstrojstva zdaroŭja, spyniena dziejańnie licenzijaŭ na medyčnuju dziejnaść u poŭnym abjomie abo ŭ častcy adpaviednych rabot i pasłuh nastupnym subjektam haspadarańnia:

u anestezijalohii i reanimatalohii:

— Tavarystvu z abmiežavanaj adkaznaściu «Valere», Miensk,

— Tavarystvu z abmiežavanaj adkaznaściu «Hrandmedyka», Miensk,

— Zamiežnamu pryvatnamu kansultatyŭnamu ŭnitarnamu pradpryjemstvu «MedArt», Miensk,

— Tavarystvu z abmiežavanaj adkaznaściu «Medekspert», Miensk,

— Tavarystvu z abmiežavanaj adkaznaściu «Radi zdorov́ja», Miensk,

— Tavarystvu z abmiežavanaj adkaznaściu «TransEnerhaOjł», Miensk,

— Sumiesnaje tavarystva z abmiežavanaj adkaznaściu «Ekamedservis — Medyčny centar», Miensk;

u sfery rabot i pasłuh pa hinekalohii:

— Tavarystvu z abmiežavanaj adkaznaściu «Žiełajem zdorov́ja», Słucak;

u častcy rabot i pasłuh pa chirurhii:

— Tavarystvu z abmiežavanaj adkaznaściu «Solfieja», Miensk,

— Pryvatnaje ŭnitarnaje pradpryjemstva pa akazańni pasłuh «Leda-Med», Baranavičy;

u častcy rabot i pasłuh pa stamatalohii chirurhičnaj:

— Tavarystvu z abmiežavanaj adkaznaściu «Stomako», Vorša.

U poŭnym abjomie licenzija na medyčnuju dziejnaść spyniena TAA «Fłorens-Dental» (Vorša). Pavodle pres-słužby ministerstva, — «za pieraškody dziejnaści kamisii Ministerstva achovy zdaroŭja ŭ praviadzieńni mierapryjemstvaŭ pa kantroli».

Siarod pryčynaŭ likvidacyi licenzijaŭ nazyvajecca adsutnaść umoŭ dla vykanańnia ambulatornych aperacyj, nievykanańnie kliničnych pratakołaŭ (standartaŭ) akazańnia meddapamohi, niapoŭnaja kamplektacyja naboraŭ dla akazańnia reanimacyjnych mierapryjemstvaŭ pry stanach, jakija pahražajuć žyćciu pacyjenta.

19 červienia ministar achovy zdaroŭja Biełarusi Vasil Žarko zajaviŭ, što ŭ krainie ŭžo pravierana dziejnaść 264 medyčnych centraŭ, 12 ź jakich pazbaŭlenyja licenzii. Pravierka zakranuła ŭsie vidy medyčnaj dziejnaści — chirurhiju, hinekalohiju, stamatalohiju dy inšyja.

U pazbaŭlenych licenzii medcentrach, pavodle ministra, byli parušeńni, jakija «mahli adbicca na zdaroŭi i žyćci ludziej».

Pravierka medyčnych centraŭ pačałasia paśla śmierci pacyjentki Julii Kubaravaj, jakoj zrabili plastyčnuju aperacyju pa karekcyi formy nosa ŭ mienskim kamercyjnym medcentry «Ekamedservis». Paśla aperacyi dziaŭčyna nie pryjšła ŭ prytomnaść. Pa hetym fakcie raspačata kryminalnaja sprava.

• 0
• 0
• 0
• 0
• 0
• 0
• 0
• 0