Dzień biełaruskaha piśmienstva adkryvali pa-rasiejsku

Sioleta tradycyjnaje štohadovaje śviata adzinstva biełaruskaha drukavanaha słova z historyjaj i kulturaj pravodzicca ŭ dvaccaty raz.

Aficyjnaje adkryćcio kulturnickaj imprezy adbudziecca 1 vieraśnia. Siońnia ž aficyjnaja častka pieršaj pałovy dnia była pryśviečana adkryćciu adramantavanych u rajcentry kinateatra, doma kultury, čyhunačnaha dy aŭtobusnaha vakzałaŭ. Čyrvonyja stužki pierarazali słužboŭcy ź Ministerstvaŭ kultury, infarmacyi, čynoŭniki z Mahiloŭskaha abłvykankamu dy Bychaŭskaha rajvykankamu.

Pieršym u Bychavie adkryli adramantavany kinateatar «Radzima». Nazvu na fasadzie pakinuli rasiejskamoŭnaj. Adkryćcio prachodziła pa-rasiejsku. Pa- rasiejsku vystupali staršynia abłvykankamu Piotar Rudnik i ministar kultury Biełarusi Barys Śviatłoŭ.

U pramovie pa-rasiejsku ministar kultury Barys Śviatłoŭ adznačyŭ: «...Choć my i pačynajem našy vialikija mierapryjemstvy z adkryćcia kinateatra, kinateatra „Radzima“, ale ž my zaŭždy pamiatajem, što na pačatku było słova i na pačatku była radzima...»

Jakim hetaje słova było, rasiejskim, ci biełaruskim, ministar Śviatłoŭ nie ŭdakładniŭ. Vonkava ž biełaruskaha słova ŭ azdableńni centralnaj vulicy rajcentru imia Lenina było značna mienš za rasiejskaje.

Na toje, što biełaruskaj movy zamała na śviacie biełaruskaj piśmiennaści i kultury, narakali i tyja z bychaŭcaŭ, ź jakimi ŭdałosia pahutaryć. Čamu tak stałasia, ludzi tłumačyli pa-roznamu. Adno ź mierkavańniaŭ: «Pryzvyčailisia havaryć na źmiešanych movach. Moładź ciapier nia duža chiniecca da biełaruskaj movy. A staryja tolki na vioskach havorać pa-biełarusku. Heta voś niapravilna. Kožnaja nacyja pavinna havaryć pa-svojmu, ale j vučyć inšyja movy».

Centram uračystaściaŭ Dnia biełaruskaj piśmiennaści zrabili plac pierad rajonnym Domam kultury. Jaho aharadzili turnikietami. Pa perymetry stajali sałdaty ŭnutranych vojsk. Na plac ludzi prachodzili praź milicejskija prapusknyja punkty. Žychary rajcentru pryznavalisia, što z takimi zachadami biaśpieki sutykajucca ŭpieršyniu.

Fasady bychaŭskich pomnikaŭ architektury — byłych zamka i synahohi, pra nieabchodnaść restaŭracyi jakich šmat havaryłasia napiaredadni Dnia biełaruskaha piśmienstva, schavali za rasfarbavanaj dziaruhaj. Zvonku schavanyja budynki byli nibyta ŭpakavanyja ŭ śviatočnyja skrynki.

Piotar Rudnik, kali adčyniali kinateatar, paviedamiŭ, što da Dnia biełaruskaha piśmienstva byli padrychtavanyja 129 abjektaŭ, na jakija patracili 200 miljardaŭ rubloŭ. Žychary Bychava adznačali, što takoha prybranaha horadu daŭno nia bačyli.

U miežach Dnia piśmiennaści zaplanavanyja vystavy, navukova-praktyčnyja kanferencyi, litaraturnyja čytańni, kancerty, dyskateka. Zavieršycca śviata fajerverkam.

• 0
• 0
• 0
• 0
• 0
• 0
• 0
• 0