Ekvador vydaŭ Rasii biełarusa, jaki skraŭ $5 miljonaŭ

Z Ekvadora ŭ Rasiju ekstradziravany ŭradženiec Biełarusi, jaki abvinavačvajecca ŭ ašukanskich dziejańniach u asabliva bujnym pamiery, paviedamlaje partał naviny.by.

Jak paviedamlaje pres-słužba NCB Interpoła MUS Rasii, minčuk Alaksandr Aŭčarenka, 1955 h.n., abvinavačvajecca ŭ ašukanskich dziejańniach, ździejśnienych hrupaj asobaŭ u asabliva bujnym pamiery.

Ustanoŭlena, što abvinavačany ŭ 2008 vystupiŭ paručalnikam kamiercyjnaha pradpryjemstva Maskoŭskaj vobłaści pierad kredytnaj ustanovaj Maskvy. U vyniku pieramovaŭ złamyśniku ŭdałosia damahčysia zaklučeńnia damovy ab pradastaŭleńni jaho firmie kredytnaj linii na ahulnuju sumu 131 młn. rub. (bolš za $5 młn). U jakaści zabieśpiačeńnia pa pazycy arhanizacyi vystupiŭ vyrableny tavar — chimičnyja srodki achovy raślin.

Paśla zaklučeńnia damovy na praciahu niekalkich miesiacaŭ kampanija Aŭčarenki spraŭna płaciła pa kredycie. U kancy 2008 vypłaty spynilisia.

U chodzie vyśviatleńnia pryčyny nievykanańnia kredytnych abaviazacielstvaŭ, akazałasia, što pradmiet zakładu nikoli nie isnavaŭ, a paručalnik źjechaŭ z Rasii. Pa fakcie ašukanskich dziejańniaŭ raspačali kryminalnuju spravu.

U vyniku apieratyŭna-vyšukovych mierapryjemstvaŭ ustanoŭlena, što Aŭčarenka, jaki chavajecca ad pravasudździa, pražyvaje ŭ Ekvadory pad čužym proźviščam.

Sajt «Ekvador siońnia» sa spasyłkaj na MUS Ekvadora paviedamlaje, što Aŭčarenka byŭ zatrymany jašče 12 lipienia minułaha hoda, ale jaho adpuścili na svabodu, tak jak jon pradjaviŭ dakumienty na imia inšaha čałavieka — Juryja Baščenki, ukrainca pa nacyjanalnaści, na padstavie jakich atrymaŭ ekvadorskaje hramadzianstva. Adnak, pavodle infarmacyi rasijskich uładaŭ, Juryj Baščenka ŭžo pamior.

U chodzie ŭzajemadziejańnia NCB Interpoła MUS Rasii i kampietentnych orhanaŭ Ekvadora złamyśnik byŭ vykryty, zatrymany i źmieščany pad vartu.

Da miesca nahadać, što ŭ Ekvadory znajšoŭ prystanišča jašče adzin minčuk. Były kapitan Pamiežnaha kamiteta Alaksandr Barankoŭ abvinavačvajecca na radzimie ŭ machlarstvie i chabarnictvie. Jon uciok ź Biełarusi ŭ 2009 i pasialiŭsia ŭ Paŭdniovaj Amierycy. U Ekvadory Barankoŭ u 2010 atrymaŭ status biežanca. Sam jon śćviardžaŭ, što pieraśledujecca biełaruskim režymam za toje, što ŭ jaho nibyta majucca dokazy ŭdziełu vysokapastaŭlenych biełaruskich čynoŭnikaŭ, u tym liku svajakoŭ Alaksandra Łukašenki, u kantrabandzie naftapraduktaŭ. Ale nijakich dokazaŭ Barankoŭ tak i nie pradstaviŭ.

Sproby viarnuć jaho na radzimu z dapamohaj Interpoła pośpiechu nie mieli. Hod tamu Nacyjanalny sud Ekvadora adkazaŭ admovaj na zapyt Biełarusi ab ekstradycyi źbiehłaha kapitana. Ułady Ekvadora padoŭžyli jamu status biežanca jašče na dva hady.

• 0
• 0
• 0
• 0
• 0
• 0
• 0
• 0