Suśvietny bank prahnazuje rost VUP Biełarusi na 1% u 2013 hodzie i na 1,5% — u 2014 hodzie. Takija acenki pryvodziacca ŭ ekanamičnym ahladzie SB, prezientacyja jakoha adbyłasia siońnia ŭ Minsku.
«Rost VUP źniziŭsia pad uździejańniem źniešnich i ŭnutranych faktaraŭ. U ekanamičnym ahladzie my praduhledžvajem, što rost VUP u Biełarusi sioleta składzie 1%, u 2014-m — 1,5%», — adznačyŭ padčas prezientacyi ahladu dyrektar Suśvietnaha banka pa Biełarusi, Ukrainie i Małdovie Čymiaa Fan.
Pavodle mierkavańnia aŭtaraŭ ahladu, źniešnija ŭmovy, uklučajučy abaviazacielstvy Biełarusi pierad Antykryzisnym fondam JeŭrAzES, «vymusiać prytrymlivacca palityki abmiežavańnia ŭnutranaha popytu ŭ čaćviortym kvartale 2013 hoda i na praciahu 2014 hoda». Jak vynik, tempy ekanamičnaha rostu ŭ Biełarusi buduć nizkimi, čakajuć ekanamisty Suśvietnaha banka.
«Biełaruś uvajšła ŭ pieryjad nizkich tempaŭ ekanamičnaha rostu. I toj vysoki rost VUP, jaki naziraŭsia da 2008 hoda, naŭrad ci mahčymy ŭ ciapierašniaj situacyi», — zajaviŭ padčas prezientacyi ahladu staršy ekanamist Suśvietnaha banka Siebaśćian Ekard.
Aŭtary ekanamičnaha ahladu nahadvajuć, što ŭ studzieni—vieraśni 2013 hoda rost VUP u Biełarusi skłaŭ 1,1% (uładami ŭstanoŭleny hadavy prahnoz rostu VUP na ŭzroŭni 8,5%). Nizkija tempy rostu, ličać ekśpierty, byli abumoŭleny źnižeńniem abjomaŭ pramysłovaj vytvorčaści i źniešniaha popytu na biełaruskuju pradukcyju.
«Padzieńnie čystaha ekspartu, jakoje adbyvałasia chutkimi tempami ŭžo ŭ pieršym kvartale, u druhim kvartale paskoryłasia ŭ vyniku zapavoleńnia rostu ŭ Rasijskaj Fiederacyi i źnižeńnia ekspartnych cen na kalijnyja ŭhnajeńni z-za raspadu kartela pamiž «Biełaruśkalijem» i «Urałkalijem», — kanstatujuć ekśpierty VB.
Niahledziačy na zapavoleńnie tempaŭ ekanamičnaha rostu ŭ Biełarusi, analityki banka miarkujuć, što «inflacyja zastaniecca na ŭzroŭni bolš jak 15% (na kaniec pieryjadu), za košt zapłanavanaha pavyšeńnia taryfaŭ na kamunalnyja pasłuhi i pasłableńnia naminalnaha abmiennaha kursu».
Aŭtary ekanamičnaha ahladu prahnazujuć, što ŭ nastupnyja hady inflacyja ŭ Biełarusi budzie zastavacca na dosyć vysokim uzroŭni. Pavodle acenak Suśvietnaha banka, inflacyja ŭ 2014 hodzie składzie 15,2%, u 2015-m — 16,2%.
Pry hetym ekśpierty čakajuć nievialikija tempy rostu VUP Biełarusi ŭ najbližejšyja hady. «My čakajem, što ŭ siarednieterminovaj pierśpiektyvie tempy ekanamičnaha rostu zastanucca ŭmieranymi, z pryčyny niaznačnaha adnaŭleńnia źniešniaha popytu (z ulikam rostu ekanomiki RF i ES) i ŭnutranaha popytu (pry praviadzieńni miakčejšaj makraekanamičnaj palityki ŭ 2015 hodzie, jaki źjaŭlajecca hodam vybaraŭ)», — havorycca ŭ ekanamičnym ahladzie.
Pavodle prahnozu Suśvietnaha banka, rost VUP Biełarusi ŭ 2015 hodzie moža skłaści 2%.
Kamientary