Rost VUP pa vynikach 2013 hoda moža skłaści 1,3%. Takaja acenka pryvodzicca ŭ prajekcie prahnozu sacyjalna-ekanamičnaha raźvićcia na 2014 hod, jaki padrychtavali ekanamičnyja viedamstvy.
Na nastupny hod ułady prahnazujuć rost VUP na ŭzroŭni 2,4%. Raniej urad mierkavaŭ, što rost VUP u 2014 hodzie moža skłaści 5,7%.
Miž tym, zhodna z prahnozam Suśvietnaha banka, jaki byŭ abnarodavany na minułym tydni, rost VUP Biełarusi moža skłaści 1% u 2013 hodzie i 1,5% — u 2014-m.
«Rost VUP źniziŭsia pad uździejańniem źniešnich i ŭnutranych faktaraŭ. U ekanamičnym ahladzie my miarkujem, što rost VUP u Biełarusi sioleta składzie 1%, u 2014-m — 1,5%», — zaznačyŭ na minułym tydni padčas prezientacyi prahnozu dyrektar Suśvietnaha banka pa Biełarusi, Ukrainie i Małdovie Čymiaa Fan.
U padrychtavanym ekanamičnym ahladzie ekśpierty Suśvietnaha banka zaznačajuć, što źniešnija ŭmovy, uklučajučy abaviazacielstvy Biełarusi pierad Antykryzisnym fondam JeŭrAzES, «prymusiać prytrymlivacca palityki abmiežavańnia ŭnutranaha popytu ŭ čaćviortym kvartale 2013 hoda i na praciahu 2014 hoda». Jak vynik — tempy ekanamičnaha rostu ŭ Biełarusi buduć nizkimi, prahnazujuć ekanamisty Suśvietnaha banka.
Pavodle acenki SB, Biełaruś uvajšła ŭ pieryjad nizkich tempaŭ ekanamičnaha rostu i toj vysoki rost VUP, jaki naziraŭsia da 2008 hoda, naŭrad ci mahčymy ŭ sioletniaj situacyi. U suviazi z hetym ekśpierty banka rekamiendujuć uradu nieadkładna pačać strukturnyja reformy, vyniki jakich dazvolać paskoryć tempy ekanamičnaha rostu.
Nahadajem, pavodle źviestak aficyjnaj statystyki, u studzieni—vieraśni 2013 hoda rost VUP skłaŭ 1,1% pry prahnozie na hod 8,5%. U 2012 hodzie ekanamičny rost u Biełarusi skłaŭ 1,5%, u toj čas jak aficyjna prahnazavaŭsia na ŭzroŭni 5,5%.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary