U Minsku chłopiec pajšoŭ na kanflikt z-za rasijskaha ściaha ŭ kiroŭcy aŭtobusa
U Minsku byŭ zatrymany aktyvist arhkamitetu pa stvareńni partyi «Biełaruskaja Chryścijanskaja Demakratyja» Aleś Kutasaŭ, jaki paprasiŭ prybrać ściah z łabavoha škła aŭtobusu «Kałodziščy-Minsk», paviedamlaje sajt bchd.info.
Zajšoŭšy ŭ aŭtobus i pabačyŭšy rasiejski ściah, Aleś Kutasaŭ na pieršym ža prypynku paprasiŭ kiroŭcu prybrać ściah, ale toj, ahryznuŭšysia, začyniŭ vakienca.
Na nastupnym prypynku ŭ aŭtobus uvajšła kanduktar, jakaja paprasiła pakazać dakumienty na prajezd. «Ja joj skazaŭ, što apłaču tolki tady, kali budzie prybrany ściah», — adznačyŭ aktyvist.
Na dyśpietčarskaj stancyi kanduktar pieradała aktyvista milicyjantam, abvinavaciŭšy jaho ŭ tym, što jon debašyryŭ i ledź nie lez u kabinu kiroŭcy.
Razam z tym prajści ŭ milicejski pastarunak dla zapisu pakazańniaŭ kanduktar admoviłasia, a kiroŭca miž tym prybraŭ ściah z aŭtobusa.
Pa słovach zatrymanaha, pa darozie ŭ pastarunak milicyjanty aburalisia, što jon razmaŭlaje pa-biełarusku, bo, pavodle ich słovaŭ, biełaruskaj movy nie isnuje, a isnuje tolki trasianka, a Rasija źjaŭlajecca najbližejšym chaŭruśnikam Biełarusi.
U adkaz aktyvist zajaviŭ, što ličyć rasiejski ściah simvałam rasiejskaj akupacyi. Pakolki ž aŭtobus źjaŭlajecca dziaržaŭnaj ułasnaściu i apłočvajecca hramadzianami, u tym liku i ŭ vyhladzie padatkaŭ, to i padobnych pradmietaŭ u hramadskim transparcie być nie pavinna, skazaŭ jon.
U pastarunku Alesia Kutasava pratrymali dziesiać chvilin i, «prabiŭšy pa bazie», adpuścili, zapisaŭšy, što praviali tłumačalnuju razmovu.
Miž tym aktyvist BCHD užo dasłaŭ skarhu u Minsktrans. «Čakaju adkazu», — adznačyŭ jon.
Ciapier čytajuć
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary