Minsk jak Łas-Viehas: repartaž z vystavy hulniavoha biznesu Russian Gaming Week u stalicy Biełarusi
U Minsku prachodzić Russian Gaming Week — vystava dasiahnieńniaŭ hulniavoha biznesu na terytoryi Biełarusi.
Reč u tym, što naša kraina zastajecca adzinym rynkam na prastory byłoha SSSR, dzie hulniavy biźnies nie byŭ zabaronieny albo abmiežavany zonami, i, pa słovach arhanizataraŭ, «znachodzicca na viaršyni papularnaści».
«Naša Niva» adpraviłasia na «Biełekspa», kab pahladzieć, čym naša kraina pryvablivaje biźniesmenaŭ ad pokiera i ruletki.
La ŭvachodu ŭ «Biełekspa» staić vialikaja matroška z łahatypam RGW — najbujniejšaj rasijskaj vystavy, pryśviečanaj hulniavomu biźniesu. Na ŭvachodzie kožny, navat zvyčajny naviednik musić atrymać bejdž — ludziej na vystavie niašmat, bo heta pieradusim śpiecyjalizavanaje mierapryjemstva.
Tematyka vystavy nadzvyčaj raznastajnaja — ad mebli dla kazino, da azartnych hulniaŭ u sacsietkach i akustyčnaha afarmleńnia pamiaškańniaŭ.
«My pravodzim hetuju vystavu štohod u Maskvie, — tłumačyć «NN» pradstaŭnica kampanii-arhanizatara Smile Expo Kaciaryna Pałavinka. — Vy viedajecie, što ŭ Rasii kazino ciapier zabaronienyja, adnak na vystavie heta nijak nie adbivajecca, kožny hod my navat pašyrajemsia».
U Minsku vystava prachodzić upieršyniu, adnak, vidać, nie apošni raz — zacikaŭlenaść zamiežnych i ajčynnych biznesmenaŭ vidavočnaja. Navat viečaryna, jakaja projdzie u miežach vystavy, nazyvajecca «Minsk — novy Łas-Viehas».
Što možna ŭbačyć na vystavie? Pieradusim jana dla ludziej, jakija naładžvajuć kantakty ŭ hulniavym biznesie: ŭ asnoŭnym kampanii zamiežnyja (ad Rasii da Malty), ale sustrakajucca i biełaruskija, naprykład vytvorcy hulniavych aŭtamataŭ Belatra Games.
Tut ža ŭ miežach vystavy rychtujucca i da konkursu prafiesijnych krupje — žadajučyja ciahnucca da ruletki i pad kłasičnaje «Staŭki skončanyja, stavak bolš niama» imknucca padhadać koler nastupnaha numara.
«Urešcie, što takoje hrošy, hrošy isnujuć kab ich tracić, — kaža viadučy i adrazu ž źviartaje ŭvahu na paŭaholenych dziaŭčyn, jakija rekłamujuć adzin z partałaŭ na hulniavuju tematyku. — Biednyja dziaŭčyny, mnie ŭ saročcy chaładnavata, a im užo ž jak?»
«Ci nie padajecca vam, što Biełaruś pieranasyčanaja i rynak pierapoŭnieny?» — pytajemsia ŭ spadaryni Pałavinki.
«U nastupnym hodzie, nakolki mnie viadoma, tut adkryvajecca adrazu dva novych kazino, — kaža spadarynia Pałavinka. — I zaraz cikavaść biźniesmenaŭ, u tym liku zamiežnych, ź Jeŭropy i ZŠA, vielmi vialikaja. My ŭčora prajechali pa minskich kazino — va ŭsich vielmi dobryja ŭražańni. Kaniešnie, vystava naša ŭ Minsku ŭpieršyniu, adnak nie apošni raz».
Siarod inšych udzielnikaŭ vystavy sustrakajem pradstaŭnikoŭ redakcyi časopisa Login Casino. «Budziecie pisać pra toje, što raspusta dabrałasia da Minska?» — žartujuć jany.
U toj samy čas praz hukaŭzmacnieńnie iznoŭ hučyć: «Staŭki zroblenyja, stavak bolš niama».
Ciapier čytajuć
ZŠA pieradali Łukašenku najnoŭšyja amierykanskija leki dla pachudańnia10
Kamientary