Žonka Bialackaha zaklikała zachodnija krainy admovicca ad «reałpalityki»

Bolš daviedacca pra situacyju z pravami čałavieka vyrašyli litoŭskija parłamientaryi za dzień da vilenskaha samitu Uschodniaha partniorstva. I zaprasili na admysłovyja słuchańni ŭ Siejm svajakoŭ palitźniavolenych, a taksama pravaabaroncaŭ, hramadskich dziejačaŭ dy lidaraŭ apazicyi.

«Toje, z čym vy sutykajeciesia ŭ Biełarusi ŭ svaim štodzionnym žyćci, — heta nie prosta parušeńnie pravoŭ čałavieka i parušeńnie asnovaŭ demakratyi. Hetyja parušeńni pravoŭ čałavieka chavajuć za saboj sapraŭdnyja čałaviečyja trahiedyi. I pra hetyja trahiedyi my pavinny kazać, u farmacie Jeŭropy my pavinny śviedčyć pra heta. Našy słuchańni arhanizavanyja dla taho, kab vy mahli pra heta raspavieści», — tłumačyć metu «Słuchańniaŭ pa situacyi z pravami čałavieka ŭ Biełarusi» były premjer-ministr Litvy, lidar parłamienckaj apazicyi Andrus Kubilus.

Pra toje, što Alesia Bialackaha ŭ kałonii pazbaŭlajuć zakonnych doŭhaterminovych sustreč i charčovych pieradač raskazała žonka asudžanaha pravaabaroncy Natalla Pinčuk.

Sustaršynia arhkamiteta pa stvareńni partyi Biełaruskaja chryścijanskaja demakratyja Pavieł Sieviaryniec — pra toje, što kolkaść palitviaźniaŭ u biełaruskich turmach nie źmianiajecca hadami. Voś i zaraz kali ciaham apošnich troch miesiacaŭ na svabodu vyjšli try — Daškievič, Franckievič i sam Sieviaryniec, to ich miesca adrazu zaniali inšyja «achviary režymu» — Uładzimir Jaromienak, Vasil Parfiankoŭ i ksiondz Łazar.

Pra toje, što jany da hetaha času dakładna nie viedajuć, što zdaryłasia sa źnikłym apieratar Źmitrom Zavadskim i ci sapraŭdnych zabojcaŭ pakarali, raskazała jaho maci Volha Zavadskaja.

«U nas hatovyja dakumienty dla taho, kab źviarnucca ŭ Haahski sud. Ale prykład — sprava Krasoŭskaha. Žonka jaho tudy źviartałasia, ale nijakaha adkazu z suda tak i nie atrymała. Atrymlivajecca, što i sensu vialikaha źviartacca niama: nijakich dakumientaŭ adpaviednych Biełaruś nie ratyfikavała, i nijakaha cisku na ŭłady nie moža z hetaj nahody…»

Žonka eks-kandydata ŭ prezidenty Mikałaja Statkieviča Maryna Adamovič raskazała pra ździeki, jakija tryvaje ŭ turmie palityk, asudžany paśla vybaraŭ 2010 hoda.

Staršynia Biełaruskaj asacyjacyi žurnalistaŭ Žanna Litvina — pra składanaści pracy niezaležnych ŚMI i žurnalistaŭ, Taćciana Raviaka — pracy pravaabaroncaŭ, Juryj Čavusaŭ — hramadskich arhanizacyj.

«Čym my možam vam dapamahčy?» — zapytaŭsia uražany Andrus Kubilus.

Pieršym zreahavaŭ sustrašynia BCHD Pavieł Sieviaryniec. Tolki pahroza naškodzić lubimaj «caccy» Łukašenki moža prymusić ułady vyzvalić palitviaźniaŭ, ličyć sustaršynia BCHD.

«Dla Łukašenki bolš značnym za samit (Uschodniaha partniorstv) źjaŭlajecca čempijanat śvietu pa chakiei, jaki buduć pravodzić z 9 pa 25 maja nastupnaha hoda.

I jon choča pakazać, što siońniašniaja Biełaruś — heta jeŭrapiejskaja kraina, jon choča zaretušavać svoj imidž apošniaha dyktatara Jeŭropy. Dumaju, što za tyja miesiacy, jakija zastalisia da čempijanatu, jeŭrapiejskija palityki mohuć zadziejničać usie ryčahi ŭpłyvu i prosta skazać Łukašenku: «Chočaš, kab čempijanat śvietu pa chakiei prachodziŭ biez ekscesaŭ, chočaš svaju cacku – vyzvalaj palitviaźniaŭ!» Pry luboj mahčymaści nieabchodna na hetym nastojvać».

Natalla Pinčuk patrabuje, kab jeŭrapiejcy admovilisia ad svajoj «reałpalityki».

«Takim čynam Jeŭrasajuz daje zrazumieć, što jon padtrymlivaje režym u Biełarusi — pa-inšamu heta traktavać prosta niemahčyma!»

A Maryna Adamovič — kab zachodnija palityki ni ŭ jakim razie nie admaŭlalisia ad sankcyj suprać biełaruskich uładaŭ.

«My tut abmiarkoŭvali mahčymaść taho, kab stvaryć nacyjanalny śpis tych proźviščaŭ ci tych kampanijaŭ, jakija albo naŭprost biaruć udzieł u represijach, albo padtrymlivajuć režym u jakaści ekanamičnych subjektaŭ i atrymlivajuć ad hetaj padtrymki vyhadu», — dzielicca płanami svaich paplečnikaŭ u Sojmie Andrus Kubilus.

Rašeńnie, jak prymusić biełaruskija ŭłady vykonvać svaje mižnarodnyja abaviazańni (naprykład, rašeńni Kamiteta pa pravach čałavieka AAN), niečakana znachodzić lidar partyi «Spraviadlivy śviet» Siarhiej Kalakin.

Zaadno pryhadvaje, što ni adno z 30 takich rašeńniaŭ naša dziaržava tak i nie vykanała.

 «U Biełarusi siońnia ździajśniajucca ź viedama ułady i pry jaje biaździejańni złačynstvy suprać čałaviečnaści. I demakratyčnyja siły siońnia pavinnyja inicyjavać stvareńnie mižnarodnaha trybunału pa Respublicy Biełaruś — pa nievykanańni joj Kanviencyi pa katavańniach i biesčałaviečnych adnosinach da dziesiatkaŭ i tysiačaŭ hramadzian svajoj krainy».

Kalehu padtrymlivaje lidar hramadzianskaj kampanii «Havary praŭdu!» Uładzimir Niaklajeŭ. I idzie dalej.

«Dobra było b stvaryć niešta nakštałt «Śpisa Mahnickaha». U jaki buduć uniesienyja usie tyja ludzi, jakija dziejničajuć jak złačyncy (u «Śpis Mahnickaha» trapili nie tolki rasijskija čynoŭniki, ale i śledčyja, sudździ, turemnyja achoŭniki i h.d., kaho paličyli vinavatymi ŭ śmierci Mahnickaha). Dla hetaha ŭ nas u krainie jość jurysty, jość pravaabaroncy, jakija mohuć dla hetaha padrychtavać jurydyčnuju bazu. I nie tolki situacyi z palitviaźniami heta tyčycca, ale i vypadkaŭ z prostymi ludźmi».

Darečy, słuchańni tranślavalisia pa litoŭskim telebačańni i praź internet. Adpaviednyja rekamiendacyi buduć ahučanyja pierad palitykami inšych krain ES. A kab pra Biełaruś nie zabyvalisia padčas samitu Uschodniaha partniorstva, udzielniki mierapryjemstva padrychtavali admysłovy zvarot da jaho ŭdzielnikaŭ.

• 0
• 0
• 0
• 0
• 0
• 0
• 0
• 0