Muziej Bahdanoviča: piać aśpiektaŭ rearhanizacyi

U budučych pieraŭtvareńniach možna vyłučyć piać aśpiektaŭ, źviazanyja pamiž saboj.

Maralna-etyčny

Bahdanovič — naš kłasik. Adzinki z tvorcaŭ taho ŭzroŭniu majuć samastojnyja ŭstanovy, dzie vyvučajecca ich tvorčaść. U Biełarusi dahetul niama dziaržaŭnych muziejaŭ, pryśviečanych tvorčaści Hareckaha i Karatkieviča.

Rearhanizacyja muzieja ŭ filiju – źnievažalnaja dla hramadstva.

Arhanizacyjny

Dziaržava musić adkryvać novyja ŭstanovy, a nie rearhanizoŭvać tyja, jakija isnujuć. 

U adnu strukturu maje sens abjadnoŭvać ustanovy, padobnyja pamiž saboj. Miž tym muziej Bahdanoviča ŭžo maje dva filijały (Dom u Rakucioŭščynie, dzie letam 1911 hoda adpačyvaŭ Bahdanovič, i «Biełaruskuju chatku» ŭ Minsku). Navat kali muziej stanie filijaj, jany buduć mieć toj ža status (bo znachodziacca na adlehłaści ad asnoŭnaha budynku).

Atrymlivajecca, tvorčaść Bahdanoviča budzie pradstaŭlena ŭ troch filijach? I kožnaja ź ich budzie roŭnaja adzinamu ŭ Biełarusi muzieju Bykava, jaki musić nieŭzabavie adkrycca.

Isnuje niebiaśpieka, što z časam muziej naohuł moža źniknuć. Na dumku Uładzimira Arłova, nieŭzabavie ŭstanova stanie filijałam. A potym uźniknie dumka: navošta filijału taki budynak? Bahdanoviču chopić zały ŭ Muziei historyi biełaruskaj litaratury.

Biurakratyčny

Vidavočna, paśla rearhanizacyi ŭsie pytańni pa vyvučeńni spadčyna Bahdanoviča daviadziecca ŭzhadniać z kiraŭnictvam Muzieja historyi biełaruskaj litaratury.

A heta lišni biurakratyzm.

Navukova-daśledčy

Taćciana Šelahovič, dyrektarka muzieja Bahdanoviča, kaža, što paśla rearhanizacyi ŭ filijale mohuć zastacca «tolki siem ci piać čałaviek, a moža, i taho mieniej». Chutčej za ŭsio, jany buduć nazirać za stanam ekspazicyi abo zajmacca ekskursijami. Astatnija piarojduć ŭ centralnuju strukturu.

Ale niaŭžo supracoŭniki zmohuć zajmacca ŭ novaj struktury tolki daśledavańniem tvorčaści Bahdanoviča? Chutčej za ŭsio, havorka budzie iści nad supolnymi prajektami. A vyvučeńnie spadčyny Maksima budzie zakansiervavana.

Hienadź Buraŭkin pryvodzić prykład z Nacyjanalnaj akademijaj navuk. U vyniku abjadnańnia pamiž saboj Instytuta litaratury i Instytuta movy ich daśledavańni istotna skaracilisia.

«Jość aptymizacyja i rearhanizacyja, a jość minimizacyja», — kaža Buraŭkin.

Test dla hramadstva

Kančatkovaje rašeńnie pra status muzieja jašče nie pryniataje. Pastanovu kalehii Minkulta pavinien zaćvierdzić Saviet Ministraŭ. Tamu hramadstva jašče moža paŭpłyvać na kančatkovaje rašeńnie. Što realna zrabić?

Udzielniki pres-kanfierencyi, jakaja prajšła siońnia na siadzibie BNF, vyłučyli niekalki šlachoŭ.

Ryžysior Valeryj Mazynski prapanavaŭ vykupić muziej Bahdanoviča. «My tolki dźviery zmožam vykupić», — z horyčču paryravaŭ jamu Buraŭkin.

«Ale kolki my hetych rezalucyj napisali? — adkazaŭ Mazynski. — Čynoŭniki chodziać na ich».

Uładzimir Arłoŭ nahadaŭ pra pastanovu Savieta Ministraŭ, ź jakoj amal nivodny punkt (naprykład, ramont «Biełaruskaj chatki», ŭstanoŭka pomnika ŭ Hrodna) nie byŭ vykanany.

Uładzimir Niaklajeŭ prapanavaŭ źviarnucca da kiraŭnictva Saŭmina ź listom. A paśla niepaźbiežnaha adkazu ab niedachopie srodkaŭ abviaścić nacyjanalnuju kampaniju ab zbory srodkaŭ na niekalki prajektaŭ.

Siarod prapanoŭ — praviadzieńnie čytańniaŭ Bahdanoviča i vystupleńnie bardaŭ na prystupkach muzieja, što musić źviarnuć uvahu hramadstva na prablemu ŭstanovy.

• 0
• 0
• 0
• 0
• 0
• 0
• 0
• 0