Krynicaj infarmacyi ab nadzvyčaj žorstkim pakarańni dziadźki lidera Paŭnočnaj Karei Kim Čen Yna staŭ satyryčny mikrabłoh,
na jaki spasłałasia kitajskaja dziaržaŭnaja hazieta Wen Wei Po. Pra toje, što zychodnaje paviedamleńnie apublikavaŭ karystalnik, viadomy humarystyčnymi vykazvańniami, piša ŭ svaim błohu prahramist Trevar Paŭeł.
Pieršaje paviedamleńnie ab tym, što Čan Son Tcheka i jašče pieciarych fihurantaŭ spravy ab karupcyi pakarali śmierciu, kinuŭšy na źjadzieńnie 120 hałodnym sabakam, źjaviłasia ŭ błohu karystalnika «Pchieńjan Čoj Senchu» (Pyongyang Choi Seongho) na kitajskim servisie Tencent Weibo 11 śniežnia 2013. Zatym natatku, zasnavanuju na hetym paviedamleńni, apublikavała kitajskaja dziaržaŭnaja hazieta Wen Wei Po.
U vydańni pry hetym nie napisali, što błohier «Pchieńjan Čoj Senchu» nie tolki nie źjaŭlajecca infarmavanaj krynicaj, ale viadomy svaimi satyryčnymi vykazvańniami na adras paŭnočnakarejskaha kiraŭnictva. U jakaści špaleraŭ u mikrabłohu vykarystanaja karcinka z namalavanym Kim Čen Ynam, jaki pakazvaje nieprystojny žest. 28 listapada toj ža karystalnik u honar Dnia padziaki, jaki adznačajecca ŭ ZŠA, napisaŭ, što ŭ hety dzień treba vykazvać padziaku paŭnočnakarejskamu lidaru.
Paŭeł padkreślivaje, što adznačany błoh sam pa sabie nie źjaŭlajecca aryhinalnaj staronkaj «Pchieńjan Čoj Senchu», pakolki toj vykarystoŭvaje ŭ jakaści asnoŭnaha svoj rachunak na servisie Sina Weibo.
Paviedamleńni ab žorstkim pakarańni, jakoje ŭžyli da Čan Son Tcheka, paśla publikacyi ŭ Wen Wei Po razyšlisia ŭ mnohich suśvietnych ŚMI, niahledziačy na zajavy pravaabaroncaŭ pra toje, što padobnyja mietady źjaŭlajucca praźmiernymi navat dla KNDR. Da hetaha ŭ presie źjaŭlalisia źviestki ab tym, što karupcyjanieraŭ pakarali śmierciu z dapamohaj zienitnych kulamiotaŭ u budynku Ministerstva dziaržbiaśpieki ŭ Pchieńjanie.
Aficyjna pra pakarańnie śmierciu Čan Son Tcheka ŭ KNDR paviedamili 12 śniežnia, nie pryvodziačy detalaŭ. Lider krainy Kim Čen Yn paśla zaŭvažyŭ, što takim čynam Pracoŭnaja partyja čyścicca ad frakcyjanieraŭ, što razburajuć jaje adzinstva. Dziadźku kiraŭnika KNDR abvinavacili ŭ rastracie dziaržaŭnych srodkaŭ i raspusnym ładzie žyćcia.
Kamientary