Sud pakinuŭ u sile vyrak Vasilu Parfiankovu

Minski haradski sud razhledzieŭ 28 studzienia kasacyjnuju skarhu byłoha palitviaźnia Vasila Parfiankova na pryhavor suda Pieršamajskaha rajona stalicy ad 5 śniežnia 2013 hoda i pakinuŭ u sile pryhavor pieršaj instancyi.

Nahadajem, 5 śniežnia sud pryznaŭ Parfiankova vinavatym u parušeńni praviłaŭ previentyŭnaha nahladu (art. 421 Kryminalnaha kodeksa): nieadnarazovaja niajaŭka dla rehistracyi ŭ adździaleńnie milicyi, prychod damoŭ paśla 20.00. Parfiankova pryhavaryli da hoda pazbaŭleńnia voli ŭ kałonii strohaha režymu z prymusovym lačeńniem ad chraničnaha ałkahalizmu pa miescy adbyćcia pakarańnia.

Padčas siońniašniaha sudovaha pasiadžeńnia advakat aktyvista Volha Biezbarodkina zajaviła, što rašeńnie suda Pieršamajskaha rajona źjaŭlajecca nieabhruntavanym, pakolki, na dumku jaje padabaronnaha, hety pryhavor byŭ vyniesieny za aktyŭnuju hramadzianskuju pazicyju, a ŭ asnovu sudovaha rašeńnia byli pakładzienyja tolki pakazańni śviedak — supracoŭnikaŭ milicyi. Pavodle słoŭ advakata, padčas suda pieršaj instancyi jany nastolki «błytalisia ŭ pakazańniach», što sudu pryjšłosia začytvać ich słovy.

Akramia taho, advakat zajaviła chadajnictva ab praviadzieńni stacyjanarnaj narkałahičnaj ekśpiertyzy, pakolki, na dumku Parfiankova, papiaredniaje ambułatornaje abśledavańnie było praviedzienaje «čysta farmalna». Mienavita zaklučeńnie hetaj łabaratornaj ekśpiertyzy stała padstavaj dla pryznačeńnia Parfiankovu prymusovych mier biaśpieki i lačeńnia. Adnak sud adchiliŭ hetaje chadajnictva.

U svaju čarhu, prakuror nie zhadziłasia z dovadami abarony, zajaviŭšy, što sud pieršaj instancyi poŭna i ŭsiebakova daśledavaŭ materyjały spravy. Jana ŭkazała na toje, što bok abarony nie asprečvaŭ miedycynskaje zaklučeńnie łabaratornaj ekśpiertyzy ŭ sudzie pieršaj instancyi.

Ciapier apazicyjny aktyvist utrymlivajecca ŭ śledčym izalatary ŭ Žodzinie (Minskaja vobłaść). Pravaabaroncy ličać, što adbyvać pakarańnie jon budzie ŭ papraŭčaj kałonii ŭ Horkach (Mahiloŭskaja vobłaść).

U 2011 hodzie Vasil Parfiankoŭ byŭ asudžany ŭ ramkach kryminalnaj spravy ab masavych biesparadkach u Minsku 19 śniežnia 2010 hoda. Jaho pryhavaryli da 4 hadoŭ pazbaŭleńnia voli ŭ kałonii strohaha režymu, ale ŭ žniŭni taho ž hoda asudžany vyjšaŭ na volu na padstavie ŭkaza prezidenta ab pamiłavańni. Paśla hetaha były palitźniavoleny nieadnarazova praśledavaŭsia z boku ŭładaŭ.

Pieraśled byłoha palitźniavolenaha pravaabaroncy razhladajuć jak pomstu ŭładaŭ i sprobu cisku na hramadskich aktyvistaŭ.

• 0
• 0
• 0
• 0
• 0
• 0
• 0
• 0