Jeŭrakamisija prapanuje ŭ adnabakovym paradku admianić myty na ŭkrainskija tavary

Jeŭrasajuz hatovy ŭ adnabakovym paradku admianić impartnyja myty na ŭkrainskija tavary, zajaviŭ učora prezident Jeŭrapiejskaj kamisii Žaze Manueł Barozu.

«Jeŭrapiejskaja kamisija hatovaja prapanavać Radzie ES i Jeŭrapiejskamu parłamientu daterminova prymianić u adnabakovym paradku pałažeńnie ab imparcie tavaraŭ pahadnieńnia ab hłybokaj i ŭsioabdymnaj zonie svabodnaha handlu pahadnieńnia ab asacyjacyi, jakoje my hatovyja padpisać. Heta aznačaje miljony zachavanych płaciažoŭ na impartnyja myty», — skazaŭ jon.

Barozu nie ŭdakładniŭ, kali ŭstupić u siłu hetaje rašeńnie. Sajt «ES-plus», spasyłajučysia na krynicu ŭ JEK, paviedamiŭ pra «nastupnyja dva tydni».

Stvareńnie zony svabodnaha handlu (ZSH) pamiž Ukrainaj i ES apisanaje ŭ pahadnieńni ab asacyjacyi. U chodzie padrychtoŭki dakumienta ES adprečvaŭ mahčymaść stvareńnia ZSH pa-za ramkami asacyjacyi.

Adnak u vieraśni minułaha hoda Radzie ES było prapanavana razhledzieć mahčymaść adnabakovaha abnuleńnia stavak na ŭkrainskuju pradukcyju.

Prapanova stała reakcyjaj na ŭkrainska-rasijskuju handlovuju vajnu.

Hety krok dazvoliŭ by ŭkrainskaj ekanomicy minimizavać straty ŭ pieryjad, kali ZSH ź ES jašče nie ŭstupić u siłu (u pieršy dzień druhoha miesiaca paśla ratyfikacyi pahadnieńnia Viarchoŭnaj radaj i Jeŭraparłamientam), a krainy Mytnaha sajuza ŭžo ŭviaduć abmiežavańni i padvysiać myty na pastaŭki ŭkrainskich tavaraŭ.

Vice-prezident Amierykanskaj handlovaj pałaty Taras Kačka raskazaŭ, što pieršapačatkova va ŭkrainskim uradzie prapanoŭvali ES bolš chutkuju ratyfikacyju pahadnieńnia. U ES ž nastojvali na ratyfikacyi pahadnieńnia paśla travieńskich vybaraŭ. Da taho ž pahadnieńnie ab asacyjacyi jašče navat nie padpisanaje.

«Heta vielmi drenny scenar dla Ukrainy: z kanca krasavika Jeŭraparłamient sychodzić na vakacyi, a potym na pieravybary. U takoj situacyi prahałasavać za damovu Jeŭraparłamient zmoža tolki ŭ kancy hoda. Adpaviedna, my apynajemsia ŭ situacyi, kali režym ZSH ź ES jašče nie dziejničaje, a Mytny sajuz užo moža pierahladać svaje myty. U takoj situacyi da kanca hoda my atrymajem vialiki minus zamiežnahandlovaha bałansu», — patłumačyŭ Kačka.

«Ukrainie prapanavany miechanizm padtrymki, anałahičny tamu, jaki hod tamu ŭžyvaŭsia ŭ dačynieńni da Małdovy.

Paśla taho jak na rynkach Mytnaha sajuza byli ŭviedzienyja abmiežavańni na małdaŭskaje vino, ES abnuliŭ mytnuju staŭku i źniaŭ kvoty na hetuju pradukcyju», — skazaŭ pres-sakratar pradstaŭnictva ES va Ukrainie Devid Stulik.

Pavodle jaho słovaŭ, hetaja libieralizacyja moža zakranuć tolki šerah najbolš adčuvalnych tavarnych hrup: «U lubym vypadku dla pryniaćcia hetaha rašeńnia treba ŭchvała Rady ES, Jeŭraparłamienta i dazvoł SHA».

ZSH dazvolić ES abnulić myty na 96,3% tavarnych pazicyj, u tym liku dla 91,8% pramysłovych tavaraŭ, 83,1% — ahrarnych.

Ajčynnyja čynoŭniki nieadnarazova kazali, što Ukraina prosić adnabakovaha źnižeńnia taryfaŭ ES. Najbolš stanoŭčy efiekt ad takoha kroku čakajecca ŭ ahrarnaj śfiery.

«Bolš za ŭsio ad hetaha vyjhrajuć vytvorcy zbožžavych: damova praduhledžvaje biazmytny ŭvoz 950 tys. t pšanicy ŭ hod, kukuruzy — 400 tys. t, jačmieniu — 25 tys. t. Z vytvorcaŭ miasa vyjhrajuć tolki pastaŭščyki ptuški, astatnija jašče nie atrymali dazvołaŭ na ekspart u ES.

Takija kroki pryviaduć da pavieličeńnia ŭ 2014 hodzie ekspartu na 500 młn dalaraŭ», — čakaje hienieralny dyrektar asacyjacyi «Ukrainski kłub ahrarnaha biznesu» Uładzimir Łapa.

Pavodle acenki ES, ukrainskija eksparciory sekanomiać 487 młn jeŭra na mytach pry eksparcie, u tym liku 330 młn jeŭra — pry pastaŭcy sielskahaspadarčaj pradukcyi, 53 młn jeŭrapraduktaŭ charčovaj pierapracoŭki, 24,4 młn jeŭra — tekstylnaj haliny.

Abnuleńnie mytaŭ i 15-pracentnaja devalvacyja hryŭni da jeŭra palepšać pazicyi Ukrainy na rynku ES.

Adnabakovaja libieralizacyja da taho ž nie stanie padstavaj dla dyskryminacyi ŭkrainskich kampanij na rynkach Mytnaha sajuza, bo jeŭrapiejskija tavary, jak i raniej, buduć traplać na ŭkrainski rynak paśla vypłaty mytaŭ.

• 0
• 0
• 0
• 0
• 0
• 0
• 0
• 0