Zatrymanych u Minsku ŭdzielnikaŭ pikieta AHP čakaje sud: Labiedźku, Ramanoŭskaha, Arastoviča adpravili na Akreścina
Zatrymanych 16 sakavika ŭ Minsku kala Kamaroŭskaha rynku ŭdzielnikaŭ pikieta Abjadnanaj hramadzianskaj partyi čakaje sud. Im inkryminujuć artykuł 23.34 Kodeksa ab administracyjnych pravaparušeńniach (udzieł u niesankcyjanavanym masavym mierapryjemstvie).
Nahadajem, udzielniki pikieta, jaki byŭ uzhodnieny z uładami jak pieradvybarny, trymali partrety 10 biełaruskich palitźniavolenych, a taksama biasśledna źnikłych Viktara Hančara, Juryja Zacharanki, Anatola Krasoŭskaha i Dźmitryja Zavadskaha.
Usiaho było zatrymana kala 10 čałaviek, u tym liku staršynia AHP Anatol Labiedźka, kiraŭnik biełaruskaha adździaleńnia mižnarodnaha tavarystva «Miemaryjał» Uładzimir Ramanoŭski, pieršy namieśnik staršyni arhkamiteta pa stvareńni BSDP (Narodnaja Hramada) Alaksandr Arastovič, videaapieratar Aleś Silič. Ich dastavili va UUS Savieckaha rajona.
Niekatorych z zatrymanych, u tym liku Volhu Majoravu, Hannu Kanapackuju, Natallu Vałakida, praz try hadziny adpuścili, skłaŭšy administracyjnyja pratakoły. Sud nad imi adbudziecca 17 sakavika.
Taksama ź milicyi byŭ adpuščany žurnalist Aleś Silič.
Astatnich, u tym liku Labiedźku, Ramanoŭskaha, Arastoviča, pieraviali ŭ Centr izalacyi pravaparušalnikaŭ na vulicy Akreścina, dzie jany buduć znachodzicca da suda. Sudy nad imi, pavodle papiarednich danych, pačnucca ranicaj u paniadziełak.
Kamientary